ރަސްމާލޭގައި އިސްރާއީލުގެ ރައްޔިތުންނާއި އިސްރާއީލުގެ ކޮންޓްރޯލްގައިވާ ފަރާތްތަކަށް އެއްވެސް މުދަލެއްގެ ވެރިކަން ލިބިގަތުން މަނާކުރުމުގެ ފިޔަވަޅުތައް އަޅާނެ ކަމަށް ހައުސިންގ މިނިސްޓަރު ޑރ. އަބްދުﷲ މުއްޠަލިބު އިޢުލާން ކޮށްފިއެވެ.
މި ވާހަކަ މިނިސްޓަރު ހާމަކުރެއްވީ، އަބޫދަބީގެ އީގަލް ހިލްސްއާ އެކު ސެޕްޓެމްބަރު 21 ގައި ސޮއިކުރި 20 ބިލިއަން ޑޮލަރުގެ "މޯލްޑިވްސް ވޯޓަރފްރަންޓް އެންޑް މެރީނާ ޕްރޮޖެކްޓް" އާ ބެހޭގޮތުން އާއްމުންގެ ކަންބޮޑުވުންތަކަށް ޖަވާބުދެއްވަމުން ހޯމަ ދުވަހު ލިންކްޑްއިންގައި ޝާއިޢުކުރެއްވި ލިޔުމެއްގައެވެ.
ރަސްމާލެއަކީ ޒަޔޫނީ ވަޒަންވެރިކުރުމުގެ ބިންގަލަކަށް ހެދިދާނެ ކަމަށް ފެތުރޭ ބިރުތަކަކީ އަސާސެއް ނެތް ބިރުތަކެއް ކަމަށް މުއްޠަލިބު ވިދާޅުވިއެވެ. އިސްރާއީލުގެ ވަޒަންވެރިކުރުން ފެތުރިފައިވަނީ ހަނގުރާމަވެރި ބާރުން ހިފާފައިވާ ސަރަހައްދުތަކުގައި ކަމަށާއި، ސޮވެރިން ޤައުމެއްގައި ބޭރުމީހުން މުދާ ގަތުމުން އެފަދަ ކަމެއް ހިނގާފައިވާ ހާދިސާއެއް ނެތް ކަމަށް އޭނާ ވިދާޅުވިއެވެ.
"ފަލަސްތީނުގެ ރައްޔިތުންނަށް ޙައްޤަކީ އަހަރެމެންގެ އެއްބައިވަންތަކަން. އަހަރެމެންގެ ގައުމީ ސިޔާސަތުގައި ބޭނުންކުރުމެއް ނޫން،" އޭނާ ވިދާޅުވިއެވެ.
2025 ވަނަ އަހަރުގެ އޭޕްރިލް މަހުން ފެށިގެން ރާއްޖޭގައި އިސްރާއީލީ ޕާސްޕޯޓު މަނާކޮށްފައިވީ ނަމަވެސް، ޑުއަލް ސިޓިޒަންޝިޕް ހުރި އިސްރާއީލު މީހުންނަށް އަނެއް ޕާސްޕޯޓުން ވަދެވޭ ކަމަށް މުއްޠަލިބު ފާހަގަކުރެއްވިއެވެ. ބޯޑަރުގެ ޗެކަކަށްވުރެ މުދާ ގަތުމުގެ ޕްރޮސެސްގައި މި ހުސްކަން ބަންދުކުރުމުގެ ފުރުޞަތު ބޮޑު ކަމަށް އޭނާ ވިދާޅުވިއެވެ.
އިޢުލާންކުރެއްވި ފިޔަވަޅުތަކުގައި ހިމެނެނީ:
- ގަންނަ ފަރާތެއް، ހިއްސާދާރެއް، ފައިނޭންސްކުރާ ފަރާތެއް ނުވަތަ ސޭލްސް އެޖެންޓެއްގެ ގޮތުގައި އިސްރާއީލު މީހުންނަށް ހުއްދަ ނުދިނުން
- ގަންނަ ކޮންމެ ފަރާތަކުން ހިއްސާކުރާ ހުރިހާ ނިސްބަތެއް އިޢުލާންކުރުން؛ ދޮގު މަޢުލޫމާތު ދީފިނަމަ ލީސް ބާޠިލުވެ، މުދާ ސަރުކާރަށް ރުޖޫޢަވުން
- ދާއިމީ ރެޒިޑެންސީ ނުވަތަ ރައްޔިތުކަން ނުލިބުން، އަދި ފްރީހޯލްޑް ނުދިނުން
- ކޮންމެ ފޭސްއެއްގައި ވެސް ރުފިޔާއިން ޔުނިޓް ގަތުމުގެ ފުރަތަމަ ފުރުޞަތު ދިވެހިންނަށް ދިނުން
ފަލަސްތީނަށް ތާއީދުކުރަމުން ދިވެހިންނަށް އަމިއްލަ އިޤްތިޞާދު ބިނާކުރެވޭނެ ކަމަށާއި، އެއީ އެކަން ރައްކާތެރިކުރާނެ ގޮތް ކަމަށް މުއްޠަލިބު ވިދާޅުވިއެވެ.
އީގަލް ހިލްސްގެ ޗެއާމަން މުޙައްމަދު އަލްއައްބާރު ބުރާސްފަތި ދުވަހު ބައެއް މީޑިއާތަކަށް ވާހަކަ ދައްކަވަމުން ވިދާޅުވެފައިވަނީ ދިވެހިރާއްޖޭގެ ޤާނޫނުތަކަށް ކުންފުނިން ފުރިހަމައަށް ތަބާވާނެ ކަމަށެވެ.
ކޮމެންޓު ފޮނުވާ