ސިއްރުން ހިނގާ ކަންތައްތަކުގެ ތެރެއިން އުފެދޭ އެއްވެސް އެއްބަސްވުމަކަށް ތާއީދު ނުކުރާނެ ކަމަށާއި، އެމްޑީޕީ ސަރުކާރެއްގައި އެފަދަ އެއްބަސްވުމަކަށް ޖާގަ ނުދެވޭނެ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުން އިބޫ ވިދާޅުވީ، ރަސްމާލެ ތަރައްޤީކުރުމަށް ފުށިދިއްގަރުފަޅު ހިއްކަނީ ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހޭދަކޮށްގެން ކަމަށާއި، އޭގެ ތެރެއިން 500 ހެކްޓަރުގެ ބިމެއް ބޭރުގެ ފަރާތަކަށް ހިލޭ ދިނުމަކީ ސުވާލު އުފެދޭ ކަމެއް ކަމަށެވެ. މި މަޝްރޫޢުން ރައްޔިތުންނާއި ސަރުކާރަށް ލިބޭ ފައިދާއަކީ ކޮބައިތޯ އެމަނިކުފާނު ސުވާލު އުފައްދަވައިފިއެވެ.
ބޭރުގެ އިންވެސްޓްމަންޓްތަކާއި، އުޞޫލުތަކެއްގެ މަތިން ރެސިޑެންސް ވިސާ ދިނުމާ އެމްޑީޕީން ދެކޮޅެއް ނުހަދާ ކަމަށް އިބޫ ވިދާޅުވިއެވެ. ނަމަވެސް މައްސަލައަކީ ރަސްމާލޭގެ މަޝްރޫޢުގައި ނޭނގޭ ކަންތައްތަކެއް ހިނގުން ކަމަށާއި، މަޢުލޫމާތު ހާމަނުކޮށްފިނަމަ އެއްބަސްވުން އުވާލުމަށް ސަރުކާރާއި އީގަލް ހިލްސްއަށް ކޮންގްރެސްއިން ގޮވާލަން ޖެހޭނެ ކަމަށް އެމަނިކުފާނު ވިދާޅުވިއެވެ.
ވ. ފޮއްތެޔޮފަޅު ކުއްޔަށް ދިން ގޮތާމެދު ސަރުކާރުގެ ބައެއް ބޭފުޅުން ކުރައްވާ ފާޑުކިޔުންތަކަށް ރައްދުދެއްވަމުން އިބޫ ވިދާޅުވީ، އެ ފަޅުން ސަރުކާރަށް 43 މިލިއަން ޑޮލަރު ލިބިފައިވާ ކަމަށާއި، ޑޮމެސްޓިކް އެއާޕޯޓެއް އެޅުމަށް ބިން ހިއްކީ ކުއްޔަށް ނެގި ކުންފުނީގެ ފައިސާއިން ކަމަށެވެ. ނ. އަތޮޅުގައި އެއާޕޯޓަކަށް ދޫކުރި ފަޅު މިސަރުކާރުން އެސްއީޒެޑްގެ ތެރެއަށް ވައްދައި ޓެކްސް ލުއިތައް ދިނުމުން ދައުލަތަށް ލިބެން އޮތް ބޮޑު އާމްދަނީއެއް ގެއްލިފައިވާ ކަމަށްވެސް އިބޫ ފާހަގަކުރެއްވިއެވެ.
ރަސްމާލެ އެއްބަސްވުމުގެ މަޢުލޫމާތު ވީއެންމެ އަވަހަކަށް ހާމަކުރަން ކުރީގެ ރައީސް މުޙައްމަދު ނަޝީދު ވެސް ގޮވާލައްވާފައިވާއިރު، ކުރީގެ ރައީސް އަބްދުﷲ ޔާމީން ވަނީ ދެން އުފެދޭ ސަރުކާރެއްގައި އެ އެއްބަސްވުން އުވާލަން ގޮވާލައްވާފައެވެ.
ކޮމެންޓު ފޮނުވާ