ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ފަސްވަނަ ކޮންގްރެސް، 986 މަންދޫބުން ބައިވެރިވެގެން މިރޭ މާލެ ސިޓީ ހޯލުގައި ފަށައިފިއެވެ. ތިން ދުވަހުގެ މި ކޮންގްރެސް ކުރިއަށްދާނީ އޮކްޓޫބަރު 1 އިން 3 އަށެވެ.
ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ޕާޓީގެ ޗެއާޕާސަން، ކުރީގެ ރައީސް މުޙައްމަދު ނަޝީދު ވިދާޅުވީ، އެމްޑީޕީއަކީ ރާއްޖޭގައި އެންމެ ގިނަ ދުވަސްވީ ސިޔާސީ ޕާޓީ ކަމަށާއި، ޕާޓީން އެންމެ ބޮޑަށް އިސްކަންދެނީ ލާމަރުކަޒީ ނިޒާމަށް ކަމަށެވެ. ދަތުރުފަތުރުގެ ނިޒާމުގެ ޒަރީއާއިން ރާއްޖެ ގުޅާލުމަކީވެސް ޕާޓީގެ ސިޔާސަތެއް ކަމަށް އެމަނިކުފާނު ވިދާޅުވިއެވެ.
ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވީ، ރަށްރަށަށް އަސާސީ ޚިދުމަތްތައް ފުރިހަމަކޮށްދިނުމަކީ ޕާޓީގެ އިސްކަމެއް ކަމަށާއި، އެ މަޤްސަދު ހާސިލުކުރުމަށް ކޮންގްރެސްގައި ބާއްވާ އިންވެސްޓްމަންޓް ފޯރަމަކީ މުހިންމު ފުރުޞަތެއް ކަމަށެވެ. ރައްޔިތުންގެ އަޑުއަހައި، ހަގީގީ ހައްލުތައް ހުށަހަޅައި، އެކަކު އަނެކަކަށް އިޙްތިރާމްކޮށްގެން އިތުބާރު ހޯދަން ޖެހޭނެ ކަމަށްވެސް އެމަނިކުފާނު ވިދާޅުވިއެވެ.
ފޯރަމްގައި ކައުންސިލްތަކުން 100 އަށްވުރެ ގިނަ މަޝްރޫޢު ހިއްސާކުރާނެ ކަމަށް ޕާޓީން ބުނެއެވެ. ހޮނިހިރުދުވަހު ޕާޓީގެ އަސާސީ ޤަވާއިދަށް އިސްލާހު ގެނައުމާއި ލާމަރުކަޒީ ޤަރާރެއް ހުށަހެޅުން ހިމެނޭއިރު، ޕާޓީގެ އެޕްލިކޭޝަން ވެސް މި ކޮންގްރެސްގައި ލޯންޗްކުރާނެއެވެ. ބޭރުގެ ޑިޕްލޮމެޓުން ވެސް ބައިވެރިވާ ކޮންގްރެސް ނިންމާލުމުގެ ރަސްމިއްޔާތު ބާއްވާނީ ހޮނިހިރުދުވަހު ރޭގަނޑު 9:00 ގައެވެ.
ކޮމެންޓު ފޮނުވާ