ތުރުކީގެ އިރުމަތީ ސަރަހައްދުގައި ހުރި، އުޅަނދެއްގެ ސިފައިގައިވާ "ދުރުޕިނާރ" ނަމަކަށް ކިޔާ ބިމުގެ ބައި، އެއީ ނޫޙުގެފާނުގެ ނާކޮޅު ހުއްޓުނު ތަންކަމަށް ވެދާނެތޯ ބެލުމަށް ދިރާސާވެރިންގެ ޓީމެއް ޚާއްސަ ރިސާޗެއް ފަށައިފިއެވެ.
"ނޯއާސް އާރކް ސްކޭންސް" ނަމުގައި މަސައްކަތްކުރާ ޓީމުން ބުނާ ގޮތުގައި، މި ބިމުގެ ބައިގެ ދިގުމިނަކީ ގާތްގަނޑަކަށް 515 ފޫޓެވެ. މިއީ ބައިބަލްގައި ބަޔާންކުރާ އުޅަނދުގެ މިންތަކާ ގުޅުވައި އާންމުކޮށް ބެލެވެމުން އަންނަ ދިގުމިނާ ގާތް މިނެކެވެ.
ދިރާސާވެރިން ދަނީ އެ ސަރަހައްދުގެ ބިމުގެ އަޑީގެ ސާމްޕަލް ނަގާ، ރެޑާއާއި ކުޑަކުޑަ ރޮބޮޓިކް ވަސީލަތްތައް ބޭނުންކޮށްގެން ބިމުގެ ދަށުގައިވާ އެއްޗެހި ދެނެގަތުމަށް މަސައްކަތްކުރަމުންނެވެ. އެގޮތުން ނަގާ ސާމްޕަލްތައް ލެބޯޓަރީގައި ތަޙުލީލުކޮށް، ޖިއޮލޮޖީގެ ހެކިތަކުގެ އަލީގައި ނަތީޖާއަކާއި ހަމައަށް ދިއުމަށް ޓީމުން ބޭނުންވެއެވެ.
ދުރުޕިނާރ ސަރަހައްދު ފާހަގަވީ 1959 ވަނަ އަހަރު، ތުރުކީ އަސްކަރިއްޔާއިން ނެގި ވައިގެ ފޮޓޯތަކެއްގައި މި ސިފަ ފެނުމުންނެވެ. އެ ތަނަށް ނަން ކިޔާފައިވަނީ އެ ފޮޓޯތައް ބެލި ކެޕްޓަން އިލްހާން ދުރުޕިނާރގެ ނަމުންނެވެ. މި ތަން ހުރީ އަރަރަތު ފަރާ ގާތްގަނޑަކަށް 30 ކިލޯމީޓަރު ދެކުނުގައެވެ.
ނަމަވެސް، ޖިއޮލޮޖިސްޓުންގެ ގިނަ ބަޔަކު ދެކެނީ ދުރުޕިނާރއަކީ ޤުދުރަތީ ގޮތުން އެ ބިމުގައި ހެދިފައިވާ ސިފައެއް ކަމަށެވެ. އެހެންކަމުން މި ދިރާސާގެ ނަތީޖާތަކަށް ސައިންސްވެރިން ދަނީ ސަމާލުކަމާއެކު ބަލަމުންނެވެ.
ކީރިތި ޤުރުއާނުގެ ސޫރަތު ހޫދުގެ 44 ވަނަ އާޔަތުގައި ބަޔާންވެގެންވަނީ ނަބިއްޔާގެ ނޫޙު ޢަލައިހިއްސަލާމްގެ އުޅަނދު ހުއްޓުނީ "ޖޫދީ" މައްޗަށް ކަމަށެވެ. ބައިބަލްގައި ބަޔާންކުރަނީ "އަރަރަތުގެ ފަރުތަކުގެ" މައްޗަށް ކަމަށެވެ.
މި ދިރާސާގެ ރަސްމީ ނަތީޖާއެއް އަދި ޝާއިޢުކޮށްފައެއް ނުވެއެވެ.
ކޮމެންޓު ފޮނުވާ