ފަލަސްޠީނުގެ ޤައިދީންނަށް މަރުގެ އަދަބު ދޭނަން: ބެން-ގްވީރު

އިސްރާއީލުގައި ދެން އުފެދޭ ސަރުކާރުގައި ދިފާޢީ ވަޒީރުކަން ލިބިއްޖެނަމަ، ޖަލުގައި ތިބި ފަލަސްޠީނުގެ ޤައިދީންނަށް މަރުގެ އަދަބު ދީ، ޣައްޒާއާއި ހުޅަނގު އައްސޭރިން ފަލަސްޠީނީން ބޭރުކުރުން ހަލުއިކުރާނެ ކަމަށް އިސްރާއީލުގެ ޤައުމީ ސަލާމަތާ ބެހޭ ވަޒީރު އިތަމާރު ބެން-ގްވީރު ބުނެފިއެވެ.

ބެން-ގްވީރު މިކަން ހާމަކުރީ، 1990 ގެ އަހަރުތަކުގައި ދިން ބޮމު ޙަމަލާތަކުގެ ތުހުމަތުގައި 1996 ވަނަ އަހަރުން ފެށިގެން ޢުމުރު ދުވަހުގެ ޖަލު ޙުކުމްތައް ތަންފީޛުކުރަމުންދާ ފަލަސްޠީނީއެއް ކަމަށްވާ ޙަސަން ސަލާމާގެ ޖަލު ގޮޅިއަށް ގޮސް، އޭނާއަށް މަރުގެ އަދަބު ދޭން ބޭނުންވާ ކަމަށް ބުނާ ވީޑިއޯއެއް ސޯޝަލް މީޑިއާގައި ޢާންމުކޮށްގެންނެވެ. ދެން އުފެދޭ އިއްތިހާދު ސަރުކާރަކާ އޭނާގެ ޕާޓީ ގުޅޭނީ ދިފާޢީ އަދި ޢަދުލުއިންޞާފާ ބެހޭ ވުޒާރާތައް ލިބޭނަމަ ކަމަށްވެސް އޭނާ ބުނެފައިވެއެވެ.

ފަލަސްޠީނުގެ ޤައިދީންނަށް މަރުގެ އަދަބު ދިނުމުގެ ހުއްދަދޭ ޤާނޫނެއް، ބެން-ގްވީރުގެ ފެކްޝަނުގެ އިސްނެގުމުގައި މިއަހަރުގެ މާރިޗު މަހު އިސްރާއީލުގެ ޤާނޫނުހަދާ މަޖިލީހުން ފާސްކޮށްފައިވާއިރު، ޢަރަބި ޤައުމުތަކާއި ބައިނަލްއަޤްވާމީ މުޖުތަމަޢުން މި ޤާނޫނަށް ފާޑުކިޔަމުންދެއެވެ. މި ބަޔާންތައް ނިކުމެފައިވަނީ އޮކްޓޫބަރު 27 ގައި އިސްރާއީލުގެ ޢާންމު އިންތިޚާބު ބޭއްވުމަށް ތައްޔާރުވަމުންދާ ދަނޑިވަޅެއްގައެވެ.

ޣައްޒާގެ ޞިއްޙީ ވުޒާރާއިން ބުނާ ގޮތުގައި، ސެޕްޓެމްބަރު 26 އަށް 74,016 ފަލަސްޠީނީން މަރުވެ، 175,068 މީހުން ޒަޚަމްވެފައިވެއެވެ. 2025 ވަނަ އަހަރުގެ އޮކްޓޫބަރު 10 ގައި އެމެރިކާގެ މެދުވެރިކަމާއެކު ހަނގުރާމަ ހުއްޓުވުމުގެ އެއްބަސްވުމެއް ޤާއިމުކުރި ނަމަވެސް، އޭގެ ފަހުން 1,145 މީހުން މަރުވެފައިވާއިރު، އެއްބަސްވުމުގެ ދެވަނަ މަރުޙަލާގެ މަޝްވަރާތައް މިހާރު ހުއްޓިފައިވެއެވެ.