ރައީސް ޑރ. މުހައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ އިހްތިރާމް އަދާކުރުމުގެ ގައުމީ މަޝްރޫއު ވިލަރެސްކުރުމަށް، ނުވަ މެންބަރުންގެ ކޮމިޓީއެއް ސަރުކާރުން އެކުލަވާލައިފިއެވެ.
ކޮމިޓީގެ ފުރަތަމަ ބައްދަލުވުން މިއަދު ބޭއްވުނީ ފަންނާއި ސަގާފަތާއި ތަރިކައާ ބެހޭ ވުޒާރާގައެވެ. އެ ބައްދަލުވުމުގައި މަޝްރޫއު ކުރިއަށް ގެންދިއުމަށް ރާވާފައިވާ ގޮތްތަކާއި ކޮމިޓީގެ ދައުރާ ބެހޭގޮތުން ތަފްސީލުކޮށް މަޝްވަރާކުރި ކަމަށް ވުޒާރާއިން ބުނެއެވެ. އަދި މަޝްރޫއު ކާމިޔާބުކުރުމަށް އަޅަންޖެހޭ ފިޔަވަޅުތަކާއި، ކަމާބެހޭ އިދާރާތަކުގެ މަސައްކަތް ގުޅުވައިގެން ކުރިއަށް ގެންދާނެ ގޮތުގެ މައްޗަށް ވެސް ހިޔާލު ފާޅުކުރިއެވެ.
ކޮމިޓީގައި ތަރިކައިގެ ވުޒާރާގެ އިތުރުން ދާހިލީ ސަލާމަތާ ބެހޭ ވުޒާރާ، ދިފާއީ ވުޒާރާ، ތައުލީމީ ވުޒާރާ، މާލީ ވުޒާރާ، ސިއްހީ ވުޒާރާ، އިސްލާމީ ކަންތައްތަކާ ބެހޭ ވުޒާރާ، ޒުވާނުންނާ ބެހޭ ވުޒާރާއާއި ޕީއެސްއެމްގެ މަންދޫބުން ހިމެނެއެވެ. ތަރިކައިގެ ވުޒާރާއިން ކޮމިޓީގައި ތަމްސީލުކުރައްވަނީ ޑެޕިއުޓީ މިނިސްޓަރު އިބްރާހިމް ސޮބާހްއެވެ.
މަޝްރޫއު ފެށުމަށް ބޭނުންވާ ފަހު ތައްޔާރީތައް މިހާރު ކުރަމުން ގެންދާ ކަމަށް ވުޒާރާއިން ބުނެއެވެ.
ކޮމެންޓު ފޮނުވާ