މާލޭގައި ދެ ސައިކަލް ޖެހި ތިން މީހަކަށް ސީރިއަސް އަނިޔާތަކެއް ވެއްޖެ

މާލޭގެ ސޯސަންމަގުގައި ރޭ ދަންވަރު ދެ ސައިކަލް ޖެހި ހިނގި ނުރައްކާތެރި އެކްސިޑެންޓެއްގައި ތިން މީހަކަށް އަނިޔާވެ، ފަރުވާދޭން ފަށައިފި އެވެ.

ފުލުހުން ބުނި ގޮތުގައި، މި ހާދިސާގެ މައުލޫމާތު ލިބުނީ ރޭ 1:12 ހާއިރު އެވެ. އެކްސިޑެންޓުގައި އަނިޔާވީ 21 އަހަރާއި 22 އަހަރުގެ ދެ ފިރިހެނުންނާއި 26 އަހަރުގެ އަންހެނަކަށެވެ. މި ތިން މީހުންނަކީ ވެސް ދިވެހިންނެވެ.

އަންހެން މީހާއަށް ފަރުވާދެމުން އަންނަނީ އޭޑީކޭ ހޮސްޕިޓަލްގަ އެވެ. އަނެއް ދެ މީހުންނަށް ފަރުވާދެނީ އައިޖީއެމްއެޗްގަ އެވެ. ނަމަވެސް، މި މީހުންގެ ހާލަތު އަދި ސާފެއް ނުވެ އެވެ.

އާންމުވެފައިވާ ވީޑިއޯއަކުން ފެންނަ ގޮތުގައި، ވެއްޓުނު އަންހެން މީހާގެ ބޮލުން ވަރަށް ބޮޑަށް ލޭ ފައިބަމުން ދިޔަ އެވެ. އަނެއް ދެ މީހުންނަށް ވެސް އެކި ވަރުގެ އަނިޔާތައް ލިބިފައި ވެ އެވެ.

ފުލުހުން ފާހަގަކުރި ގޮތުގައި، އެކްސިޑެންޓުގައި ހިމެނޭ 21 އަހަރުގެ ސައިކަލް ދުއްވި މީހާގެ އަތުގައި އެއްގަމު އުޅަނދު ދުއްވުމުގެ ލައިސަންސެއް ނެތެވެ.