ފަތުރުވެރިކަމުގެ ދާއިރާއިން ބޭންކުތަކަށް މާރުކުރަންޖެހޭ ޑޮލަރުގެ މިންވަރު ބޮޑުކުރުމާ އެކު، އޮންލައިންކޮށް ވިޔަފާރިކުރުމުގައި ރައްޔިތުންނަށް މިހާރު ދިމާވެފައިވާ ދަތިތަކަށް ހައްލެއް ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރިސޯޓުތަކުން ލިބޭ ޑޮލަރު އާމްދަނީގެ 20 އިންސައްތައިގައި ކުރިން އޮތް މާރުކުރުމުގެ މިންވަރު 40 އިންސައްތައަށް ބޮޑުކުރުމަށް ރައްޔިތުންގެ މަޖިލީހުން ފާސްކުރި ބިލު ރައީސް ތަސްދީގު ކުރެއްވީ މިދިޔަ ހޯމަ ދުވަހުއެވެ. މި ބަދަލު ގެނައީ ރާއްޖޭގެ މާލީ ނިޒާމުގެ ތެރޭގައި ބޭރު ފައިސާ ދައުރުވާ މިންވަރު އިތުރުކުރުމުގެ މަގުސަދުގައެވެ.
ބޭންކް އޮފް މޯލްޑިވްސްއަށް ލިބޭ ޑޮލަރަށްވުރެ ޑިމާންޑު ބޮޑުވުމުގެ ސަބަބުން، މިދިޔަ މެއި މަހުން ފެށިގެން އެ ބޭންކުން ވަނީ އޮންލައިން ޕްލެޓްފޯމްތަކުން ވިޔަފާރިކުރެވޭ މިންވަރަށް ލިމިޓުތަކެއް ކަނޑައަޅާފައެވެ. ޚާއްސަކޮށް ޓީމޫ އަދި ޝެއިން ފަދަ ވެބްސައިޓުތަކުން މުދާ ގަންނަ ފަރާތްތަކަށް މިކަމުގެ ސަބަބުން ބޮޑެތި އުނދަގޫތަކާ ވަނީ ކުރިމަތިވެފައެވެ.
ރައީސް އޮފީހުގައި އިއްޔެ އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، ގާނޫނުތަކަށް އިސްލާހު ގެންނަނީ ސީދާ ރައްޔިތުންނަށް ދިމާވެފައިވާ މައްސަލަތަކަށް ހައްލު ހޯއްދަވައި ދެއްވުމަށް ކަމަށެވެ. އަދި ވަގުތުން ނަތީޖާ ނުފެނުނު ކަމުގައި ވިޔަސް، ގާނޫނު ތަންފީޒުކުރެވެން ފެށުމާ އެކު އަވަހަށް މި މައްސަލައަށް ނިމުމެއް އަންނާނެ ކަމަށް ވިދާޅުވިއެވެ.
ނަމަވެސް، 40 އިންސައްތަ ޑޮލަރު މާރުކުރުމަށް ނިންމި ނިންމުމަކީ ދެމެހެއްޓެނިވި ގޮތެއްގައި ކުރެވޭނެ ކަމެއް ނޫން ކަމަށް ބުނެ، އިދިކޮޅު ފަރާތްތަކުންނާއި ފަތުރުވެރިކަމުގެ ސިނާއަތުގެ ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ކޮމެންޓު ފޮނުވާ