އައްސުލްޠާން އަލްޣާޒީ މުޙައްމަދު ތަކުރުފާނުލްއަޢުޡަމް، ބޮޑު ތަކުރުފާނުގެ ޤައުމީ ޖިހާދަކީ ދިވެހިންގެ ހިތްވަރާއި ކެރުމުގެ މިސާލެއް ކަމުގައި ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.
ޤައުމީ ދުވަހުގެ މުނާސަބަތުގައި ސޯޝަލް މީޑިއާގައި ޙިއްޞާކުރެއްވި މެސެޖެއްގައި ފަސްޓް ލޭޑީ ވިދާޅުވީ ބޮޑު ތަކުރުފާނުގެ ޖިހާދަކީ ދިވެހިންގެ އެއްބައިވަންތަކަމާއި ޢަޒުމުގެ ރަމްޒެއް ކަމުގައެވެ.
"ދިވެހި ޤައުމުގެ މިނިވަންކަމަށްޓަކައި ހަނގުރާމަކުރެއްވި ބަޠަލުންގެ ހަނދާން އައުކުރަމުން، މި އުފާވެރި ޤައުމީ ދުވަހުގެ ތަހުނިޔާ އަރިސްކުރަން،" ފަސްޓް ލޭޑީ ސާޖިދާ މުޙައްމަދުގެ މެސެޖުގައި ވިދާޅުވެފައިވެއެވެ.
ޤައުމީ ދުވަހަކީ ޕޯޗުގީޒުންގެ އަޅުވެތިކަމުން ދިވެހިރާއްޖެ މިނިވަންކުރެއްވުމަށް މުޙައްމަދު ތަކުރުފާނު ކުރެއްވި ޖިހާދު ފާހަގަކުރުމުގެ ގޮތުން ފާހަގަކުރާ ދުވަހެކެވެ. މި ދުވަސް ފާހަގަކުރަނީ ހިޖުރައިން 981 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ދުވަހުއެވެ.
ޤައުމީ ދުވަސްތައް ފުރިހަމައަށް ފާހަގަކުރުމަށް ސަރުކާރުން ޚާއްޞަ އަހަންމިއްޔަތުކަމެއް ދެއްވައެވެ. އެގޮތުން މި އަހަރުގެ ޤައުމީ ދުވަސް ފާހަގަކުރުމުގެ ގޮތުން ތަފާތު ޙަރަކާތްތަކެއް ބޭއްވުމަށް ސަރުކާރުން ވަނީ ނިންމަވާފައެވެ. ޤައުމީ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ ޤައުމީ ބަޠަލު މުޙައްމަދު ތަކުރުފާނު އުފަންވެވަޑައިގެންނެވި ރަށް ކަމަށްވާ އުތީމުގައެވެ.
ކޮމެންޓު ފޮނުވާ