ބީއެމްއެލްގެ ބޭންކިން ވިއުގަ ފުޅާކޮށް، އިތުރު ހަތް ރަށެއްގައި ބްރާންޗުގެ ޚިދުމަތް ފަށައިފި

ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ އިތުރު ހަތް ރަށެއްގައި ބްރާންޗުގެ ޚިދުމަތް މިއަދު ފަށައިފިއެވެ.

މިއަދު ހެނދުނު ބޭއްވި ޚާއްޞަ ރަސްމިއްޔާތެއްގައި މި ބްރާންޗުތައް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އަލަށް ޚިދުމަތް ދޭން ފެށި ބްރާންޗުތައް ހުރީ ހއ. ހޯރަފުށި، ށ. ކަނޑިތީމު، ރ. އަލިފުށި، ޅ. ހިންނަވަރު، އދ. މާމިގިލި، ގއ. ގެމަނަފުށި އަދި ލ. މާވަށުގައެވެ.

މި ހަތް ބްރާންޗާއެކު ބީއެމްއެލްއިން މިހާރު ރާއްޖޭގެ 20 އަތޮޅެއްގައި ޖުމްލަ 55 ބްރާންޗެއް ދަނީ ހިންގަމުންނެވެ. މީގެ ތެރެއިން 17 ބްރާންޗެއް ހުޅުވާފައި ވަނީ ފާއިތުވި ދެ އަހަރު ދުވަހުގެ ތެރޭގައި ކަމަށް އެ ބޭންކުން ބުނެއެވެ. ބޭންކުން ދެކޭ ގޮތުގައި މިއީ ބޭންކިން ޚިދުމަތްތައް ރައްޔިތުންނާ ވީހާވެސް ގާތުން ފޯރުކޮށްދިނުމަށް ކުރެވެމުންދާ ދެމެހެއްޓެނިވި އިންވެސްޓްމަންޓެއްގެ ނަތީޖާއެވެ.

މި ރަސްމިއްޔާތުގައި ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފް ވިދާޅުވީ، "ބޭންކް އޮފް މޯލްޑިވްސްއަށް ލިބޭ ކުރިއެރުން އަޅުގަނޑުމެން އިންވެސްޓް ކުރަނީ މުޖުތަމައުތަކުގައި ބޭންކުގެ ޚިދުމަތްތައް ފުޅާކުރުމަށް" ކަމަށެވެ.

އާ އީޖާދުތަކާއި ފުޅާ ޚިދުމަތްތަކުގެ ޒަރީއާއިން މުޖުތަމައުތަކަށް އެހީތެރިކަން ފޯރުކޮށްދިނުމުގައި ބީއެމްއެލް އަބަދުވެސް ދެމިއޮންނާނެ ކަމަށް އެ ބޭންކުން ބުނެއެވެ.