ދިވެހި ރައްޔިތުންގެ ވަޒީފާގެ ހައްގުތަކަށް ސަރުކާރުން އަރައިގަންނަމުންދާ ކަމަށާއި، އެކަމާ ދެކޮޅަށް އެމްޑީޕީން އަބަދުވެސް ތެދުވާނެކަމަށް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
"ވަޒީފާ ބުރާސްފަތި" ގެ ނަމުގައި އެމްޑީޕީން މުޅި ރާއްޖޭގައި ކުރިއަށްގެންދާ އިހުތިޖާޖުގައި ވާހަކަދައްކަވަމުން ޝާހިދު ވިދާޅުވީ، ސަރުކާރުން ރައްޔިތުންނަށް ބިރުދައްކައި އަޅުވެތިކޮށްގެން ނުހިފެހެއްޓޭނެކަން މި ހަރަކާތުން ސާބިތުކޮށްދީފި ކަމަށެވެ. މިއީ ސިޔާސީ ދައުވާތަކާއި، ވަޒީފާއިން ކެނޑުމާ ދެކޮޅަށް އަޑުއުފުލުމުގެ ގޮތުން ފެށި ހަރަކާތެކެވެ. މި ހަރަކާތުގެ ތެރެއިން، ވަޒީފާއިން ވަކިކޮށް އަނިޔާ ލިބެމުންދާ ފަރާތްތަކަށް ގާނޫނީ އެހީތެރިކަން ފޯރުކޮށްދިނުމަށް އެ ޕާޓީން ވަނީ ނިންމާފައެވެ. އަދި އެމްޑީޕީގެ ވެރިކަމެއްގައި، ނުހައްގުން ވަޒީފާ ކަނޑާލާފައިވާ ފަރާތްތަކަށް އަލުން ވަޒީފާ އިއާދަކޮށްދެއްވާނެކަމުގެ ޔަގީންކަންވެސް ޝާހިދު ދެއްވިއެވެ.
ޝާހިދު އިތުރަށް ވިދާޅުވީ އެމްޑީޕީގެ މެމްބަރުންނަކީ ދައްކާ ބިރަކަށް ފަހަތަށް ޖެހޭނެ ބައެއް ނޫން ކަމަށާއި، އެ ޕާޓީ އޮތީ ސަރުކާރަށް ގޮންޖަހައި ބަލިކޮށްލަން ތައްޔާރަށް ކަމަށެވެ. މީގެ ކުރިން މިދިޔަ އޮކްޓޯބަރު މަހުގެ ތެރޭގައިވެސް އެމްޑީޕީން ވަނީ "ލޫޓުވައިފި" ގެ ނަމުގައި މާލޭގައި ބޮޑު މުޒާހަރާއެއް ބާއްވާފައެވެ. އެ މުޒާހަރާއާ ގުޅިގެން މާލޭ ސިޓީ ކައުންސިލްގެ މެންބަރު ޒާޔާ ހިމެނޭހެން އިތުރު ބައެއްގެ މައްޗަށް ސަރުކާރުން ވަނީ ދައުވާވެސް އުފުލާފައެވެ.
ކޮމެންޓު ފޮނުވާ