ބައިނަލްއަޤުވާމީ ގޮތުން ފާހަގަކުރާ ދުންފަތާ ދެކޮޅަށް މަސައްކަތްކުރާ ދުވަހާ ގުޅިގެން، ރާއްޖޭގެ އަންނަން އޮތް ޖީލުތައް ދުންފަތުގެ ނުރައްކާތެރި ވަބާއިން ސަލާމަތްކުރުމަށް އެންމެން ގުޅިގެން މަސައްކަތްކުރުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ގޮވާލައްވައިފިއެވެ.
ކޮންމެ އަހަރެއްގެ މެއި 31 ވަނަ ދުވަހަކީ ދުނިޔޭގެ ފެންވަރުގައި ދުންފަތާ ދެކޮޅަށް އަޑުއުފުލައި ހޭލުންތެރިކަން އިތުރުކުރާ ދުވަހަކަށް ވާއިރު، މި ދުވަހުގެ މުނާސަބަތުގައި މީސްމީޑިއާ މަންސަ "އެކްސް" ގައި ކުރެއްވި ޕޯސްޓެއްގައި އެކަމަނާ ވަނީ މުހިންމު މެސެޖުތަކެއް ދެއްވާފައެވެ. އެގޮތުން، ނިކޮޓިންއާއި ދުންފަތުގެ އެކި ބާވަތްތަކުން ރައްކާތެރިވުމަކީ ކޮންމެ ޒުވާނަކަށްމެ ލިބިގެންވާ ޙައްޤެއްކަން ފާހަގަކުރައްވައި، މި ނުރައްކާތެރި އާދައިން ކުދިން ސަލާމަތްކުރުމަށް އައު އަޒުމަކާއެކު ނުކުތުމަށް އެދިވަޑައިގަތެވެ.
މީގެ އިތުރުން މެޑަމް ސާޖިދާ ވަނީ ދުންފަތާ ދެކޮޅަށް މިހާރުގެ ސަރުކާރުން އަޅުއްވަމުން ގެންދަވާ ހަރުދަނާ ފިޔަވަޅުތަކަށްވެސް އަލިއަޅުއްވާލައްވާފައެވެ. ޚާއްޞަކޮށް ތަޢުލީމީ ނިޒާމުގެ ތެރެއިން ކުދިން ހޭލުންތެރިކުރުވައި، މުޅި މުޖުތަމަޢު ބައިވެރިކޮށްގެން ދެމެހެއްޓެނިވި މަސައްކަތްތަކެއް ކުރުމުގެ މުހިންމުކަން އެކަމަނާ ފާހަގަކުރެއްވިއެވެ. އެކަމަނާގެ އުންމީދަކީ އެންމެން ގުޅިގެން ކުރާ މަސައްކަތުން، ދުންފަތުގެ އިސްތިޢުމާލުކުރުމާ ދުރު، ދުޅަހެޔޮ މުސްތަޤުބަލެއް އަދި އުފާވެރި ޖީލެއް ބިނާކުރުމެވެ.
ކޮމެންޓު ފޮނުވާ