އަޟްޙާ ޢީދުގެ އުފާ ފާޅުކޮށް ކުޅިވަރުތައް ކުރިއަށްގެންދާއިރު، އިސްލާމީ ރިވެތި އުސޫލުތަކާއި މިންގަނޑުތަކުގެ ތެރޭގައި ހުރިހާ ހަރަކާތްތަކެއްވެސް ބޭއްވުމަށް އިސްލާމިކް މިނިސްޓަރު މުޙައްމަދު ޝަހީމް ޢަލީ ސައީދު އާއި ސަރުކާރުގެ އިސް ފަރާތްތަކުން އިލްތިމާސްކުރައްވައިފިއެވެ.
މިނިސްޓަރު ޝަހީމް ސޯޝަލް މީޑިއާގައި ހިއްސާކުރެއްވި މެސެޖެއްގައި ވިދާޅުވީ، ބޮޑު ޢީދަކީ ޙައްޖުގެ މަތިވެރި އަޅުކަމާ ގުޅިފައިވާ އުފާވެރި މުނާސަބަތެއް ކަމަށާއި، އެހެންކަމުން މުޖުތަމައުގައި ހިންގާ ކުޅިވަރުތަކާއި އުފާފާޅުކުރުންތައް ކުރިއަށް ގެންދަންވާނީ އިސްލާމީ ސަގާފަތާ ފުށުނާރާ ގޮތަށް ކަމަށެވެ. އަދި އުފާފާޅުކުރުމުގެ ތެރޭގައިވެސް އިސްލާމީ އަޚުލާގާއި ރީތި އާދަކާދަތައް ދެމެހެއްޓުމަށް އެމަނިކުފާނު ވަނީ ނަސޭހަތްތެރިވެވަޑައިގެންފައެވެ.
މިކަމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެސް ވަނީ ދިވެހީންގެ ރީތި އާދަކާދަތަކާ ބީރައްޓެހި ކަންކަމުން ދުރުހެލިވުމަށް ގޮވާލައްވާފައެވެ. ރައީސް ފާހަގަކުރެއްވި ގޮތުގައި ޢީދަކީ މުޅި މުސްލިމް އުންމަތް އެއްބައިވަންތަކޮށްދީ، ގައުމުގެ އަމާންކަމާއި ސުލްހަވެރިކަން އާލާކޮށްދޭ ދެމެހެއްޓެނިވި މިސާލެކެވެ. މީގެ އިތުރުން، މިއަހަރުގެ ޢީދު ޚުތުބާގައިވެސް ވަނީ ޢީދުގެ ދުވަސްތަކަކީ ކައިބޮއި އުފާކުރުމުގެ ދުވަސްތަކެއް ނަމަވެސް، ދެޖިންސު މަސްހުނިނުވާނެހެން ދީނީ އިމުގެ ތެރެއިން ހަރަކާތްތައް އިންތިޒާމުކުރުމަކީ ކޮންމެ މުސްލިމެއްގެ މައްޗަށް ލާޒިމުވެގެންވާ ކަމެއްކަން ތަކުރާރުކޮށް ހަނދާންކޮށްދީފައެވެ.
ކޮމެންޓު ފޮނުވާ