ދިވެހިރާއްޖޭގެ ގައުމީ އެއާލައިން، މޯލްޑިވިއަން އިން ދަތުރުކުރާ ފަސިންޖަރުންނަށް އިންޑިއާގެ އަނަންތަޕޫރީ ހޮސްޕިޓަލުން ޚާއްސަ ޑިސްކައުންޓްތަކެއް ލިބޭގޮތަށް މިއަދު ފަހުމުނާމާއެއްގައި ސޮއިކޮށްފިއެވެ.
އިންޑިއާގެ ތުރިވަނަންތަޕޫރަމްގައި ހުންނަ އަނަންތަޕޫރީ ހޮސްޕިޓަލް އެންޑް ރިސާޗް އިންސްޓިޓިއުޓާއެކު ވެވުނު މި އެއްބަސްވުމުގެ މައިގަނޑު ބޭނުމަކީ ދިވެހިންނަށް ބޭސްފަރުވާގެ ކަންކަން އިތުރަށް ލުއިފަސޭހަ ކޮށްދިނުމެވެ. އެގޮތުން، މޯލްޑިވިއަންގެ ބޯޑިންގ ޕާސް ބޭނުންކޮށްގެން އެ ހޮސްޕިޓަލުން އެޑްމިޓްކޮށްގެންނާއި ނުކޮށް ދޭ ފަރުވާތަކުން ޚާއްސަ ޑިސްކައުންޓްތަކެއް ލިބޭނެއެވެ. އޭގެ ތެރޭގައި ހެލްތު ޗެކަޕް ޕެކޭޖްތަކުން 15 އިންސައްތަ އަދި ލެބޯޓަރީއާއި ރޭޑިއޮލޮޖީގެ ޓެސްޓުތަކުން 10 އިންސައްތައިގެ ޑިސްކައުންޓެއް ލިބޭނެކަމަށް މޯލްޑިވިއަން އިން މަޢުލޫމާތުދެއެވެ.
މީގެ އިތުރުން، ބަލިމީހުން އުފުލަންޖެހޭ ތަކުލީފުތައް ކުޑަކޮށްދިނުމުގެ ގޮތުން ތުރިވަނަންތަޕޫރަމް އިންޓަރނޭޝަނަލް އެއާޕޯޓުން ފެށިގެން ހޮސްޕިޓަލާ ހަމައަށް ހިލޭ އެމްބިއުލާންސްގެ ޚިދުމަތް ފޯރުކޮށްދިނުމަށްވެސް މި އެއްބަސްވުމުގެ ތެރެއިން ވަނީ ހަމަޖައްސާފައެވެ.
ތުރިވަނަންތަޕޫރަމަކީ ފެންވަރު ރަނގަޅު ޞިއްޙީ ޚިދުމަތްތަކެއް ލިބެން ހުންނަ ރާއްޖެއާ ގާތް މަންޒިލަކަށް ވުމުން، ގިނަ އަދަދެއްގެ ދިވެހިން އާންމުކޮށް ބޭސްފަރުވާއަށް އެ ސިޓީއަށް ދަތުރުކުރެއެވެ. އެހެންކަމުން، މިއަދު ސޮއިކުރެވުނު މި ފަހުމުނާމާގެ ސަބަބުން މޯލްޑިވިއަން މެދުވެރިކޮށް އެ ސިޓީއަށް ދަތުރުކުރާ ގިނަ ދިވެހިންނަށް ބޮޑެތި ފަސޭހަތަކަކާއި މާލީގޮތުން ލުއިތަކެއް ލިބިގެންދާނެކަމަށް ދެ ފަރާތުންވެސް އުންމީދުކުރެއެވެ.
ކޮމެންޓު ފޮނުވާ