އިންތިޚާބުތައް ބާއްވަން ފަސް އަހަރުން އެއް ފަހަރު 100 މިލިއަން ރުފިޔާ ޚަރަދުކުރަން ޖެހުނަސް އެއީ ބޮޑު އަދަދެއް ނޫން ކަމަށާއި، ދެ އިންތިޚާބު އެއްކޮށްލައިފިނަމަ ސަރުކާރު ޖަވާބުދާރީ ކުރުވުމުގެ ފުރުސަތު މުޅިން ގެއްލިގެންދާނެ ކަމަށް ކުރީގެ ރައީސް އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާމެދު ރައްޔިތުންގެ ފެންނަ ނުފެންނަ ވޯޓަކަށް ދާން ސަރުކާރުން ނިންމާފައިވާތީ، އެކަމާ ދެކޮޅަށް އެމްޑީޕީން ރޭ ބޭއްވި ޖަލްސާގައި ވާހަކަފުޅު ދައްކަވަމުން ޞާލިހު ވިދާޅުވީ، ސަރުކާރުން މި ބަދަލު ގެންނަން އުޅެނީ ޚަރަދު ކުޑަކުރުމުގެ ނަމުގައި ކަމަށެވެ. ނަމަވެސް ހަގީގަތުގައި މިއީ މިހާރު އޮތް މަޖިލީހުގެ ދައުރު ކުރުކުރުން ކަމަށް އެމަނިކުފާނު ސިފަކުރެއްވިއެވެ. ދެ އިންތިޚާބު އެއްކޮށްލައިގެން 50 މިލިއަން ރުފިޔާ ސަލާމަތް ކުރެވޭނެ ކަމަށް ސަރުކާރުން ބުނާ ވާހަކައަށް ރައްދު ދެއްވައި ޞާލިހު ވިދާޅުވީ، ޑިމޮކްރެޓިކް ނިޒާމެއްގައި އިންތިޚާބު ބާއްވަން އެވަރުގެ ޚަރަދެއް ކުރުމަކީ ބޮޑު ކަމެއް ނޫން ކަމަށެވެ. އެގޮތުން 60 މިލިއަން ޚަރަދުވިޔަސް އެއީ އަހަރަކަށް ޖެހޭ 12 މިލިއަން ރުފިޔާ ކަމަށާއި، އެއީ މަހެއްގެ މައްޗަށް އެއް މިލިއަން ރުފިޔާކަން ފާހަގަކުރައްވައި، ހަމައެކަނި ޚަރަދު ކުޑަކުރަން އިންތިޚާބުތަކުގެ ނިޒާމު ބަދަލުކޮށްގެން ނުވާނެ ކަމަށް ވިދާޅުވިއެވެ.
ގާނޫނުއަސާސީއަށް 18 އަހަރުވެފައިވާއިރު، ކުއްލިއަކަށް މިފަދަ ބޮޑު ބަދަލެއް ގެންނަން އުޅޭ ސަބަބާމެދު ސުވާލު އުފައްދަވަމުން ޞާލިހު ވިދާޅުވީ، މިކަމުގައި ރައްޔިތުންނަށް ވާނުވާ ސާފުނުވާ ކަމަށެވެ. އަދި ގާނޫނުއަސާސީ އިސްލާހުކުރާނަމަ އެކަމަށް އެކަށީގެންވާ ވަގުތު ދީ، ފުޅާ ދާއިރާއެއްގައި ބަހުސްކުރެވި، ރައްޔިތުންގެ ޚިޔާލު ހޯދަންޖެހޭނެ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން ތާރީޚީ ނަތީޖާތަކަށް އަލިއަޅުވާލައްވައި ޞާލިހު ވިދާޅުވީ، ރިޔާސީ އިންތިޚާބަށްފަހު އޮންނަ މަޖިލިސް އިންތިޚާބުތަކުގައި އަބަދުވެސް ވެރިކަން ކުރާ ޕާޓީން ބޮޑު އަޣުލަބިއްޔަތެއް ހޯދާ ކަމަށެވެ. އެގޮތުން 2013 ވަނަ އަހަރާއި، އެމްޑީޕީގެ ވެރިކަމުގައި އަދި މިހާރުގެ ސަރުކާރުން ވެސް މަޖިލީހުގެ ބޮޑު އިންސައްތައެއް ކާމިޔާބުކޮށްފައިވާކަން ފާހަގަކުރެއްވިއެވެ. އެހެންކަމުން ދެ އިންތިޚާބު އެއް ދުވަހެއްގައި ބާއްވައިފިނަމަ، ދައުލަތުގެ ވަސީލަތާއި ނުފޫޒު ބޭނުންކޮށްގެން ސަރުކާރުން މުޅި މަޖިލިސް އެކުގައި ނަގާނެ ކަމުގެ ކަންބޮޑުވުން އެމަނިކުފާނު ފާޅުކުރެއްވިއެވެ. ޞާލިހު ވިދާޅުވި ގޮތުގައި އޭގެ ނަތީޖާއަކަށް ވާނީ ސަރުކާރު ޖަވާބުދާރީ ކުރުވުމުގެ ފުރުސަތު މުޅިން ބަންދުވެ، ހުރިހާ ބާރެއް އެއްބައެއްގެ އަތްމައްޗަށް ދިއުމެވެ. އަންނަ އޭޕްރީލް މަހު ނަގާ މި ވޯޓުގައި "ނޫން" ޖެހުމަށް ގޮވާލައި އިދިކޮޅު އެމްޑީޕީން މިހާރު ވަނީ ސިލްސިލާ ހަރަކާތްތަކެއް ފަށާފައެވެ.
ކޮމެންޓު ފޮނުވާ