ޖަނަވަރީ މަހު ހުށަހެޅި ކުޑަކުދިންނަށް ކުރާ އަނިޔާގެ މައްސަލަތައް މަދުވެއްޖެ

މިދިޔަ އަހަރުގެ ޑިސެމްބަރު މަހާ އަޅާބަލާއިރު، ނިމިދިޔަ ޖަނަވަރީ މަހު ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީއަށް ހުށަހެޅުނު ކުޑަކުދިންނަށް ކުރާ އަނިޔާގެ މައްސަލަތައް މަދުވެއްޖެއެވެ.

މިނިސްޓްރީގެ ތަފާސްހިސާބުތައް ދައްކާ ގޮތުން މިދިޔަ ޑިސެމްބަރު މަހު ކުޑަކުދިންނަށް ކުރާ އަނިޔާގެ 85 މައްސަލައެއް ހުށަހަޅާފައިވާއިރު، ޖަނަވަރީ މަހު މި އަދަދު ވަނީ 64 އަށް ދަށްވެފައެވެ. މިއީ ޑިސެމްބަރު މަހާ އަޅާކިޔާއިރު 21 މައްސަލައިގެ ދަށްވުމެކެވެ. މި މުއްދަތުގައި ހުށަހެޅުނު މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ކުޑަކުދިންނާމެދު އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ 30 މައްސަލައެއް ޖަނަވަރީ މަހު ހުށަހަޅާފައިވެއެވެ.

މައްސަލަތަކުގެ ބާވަތްތަކަށް ބަލާއިރު، ދެވަނައަށް އެންމެ ގިނައީ ޖިންސީ ހާނިއްކައިގެ މައްސަލަތަކެވެ. ޖަނަވަރީ މަހު ޖިންސީ ހާނިއްކައިގެ 13 މައްސަލައެއް ހުށަހަޅާފައިވާއިރު، ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 8 މައްސަލައެއް ވެސް ވަނީ ރިޕޯޓުކޮށްފައެވެ. މީގެ އިތުރުން ނަފްސާނީ ހާނިއްކައިގެ 7 މައްސަލައަކާއި ޖިސްމާނީ ހާނިއްކައިގެ 4 މައްސަލައެއް ވެސް މިނިސްޓްރީއަށް ހުށަހަޅާފައިވާކަމަށް ތަފާސްހިސާބުތަކުން ދައްކައެވެ.

އަނިޔާގެ މައްސަލަތަކުގެ އިތުރުން، ދައުލަތުގެ ބެލުމުގެ ދަށުގައި ތިބި ކުދިންގެ އަދަދުތައް ވެސް މިނިސްޓްރީން ވަނީ ހާމަކޮށްފައެވެ. އެގޮތުން ޖަނަވަރީ މަހުގެ ނިޔަލަށް ދައުލަތުގެ ބެލުމުގެ ދަށުގައި ޖުމްލަ 151 ކުދިން ތިބިއިރު، އޭގެ ތެރޭގައި ހިމެނެނީ 83 ފިރިހެން ކުދިންނާއި 68 އަންހެން ކުދިންނެވެ.

މައްސަލަތައް ރިޕޯޓުކުރުމާއި އެހީތެރިކަން ހޯދުމަށް ގުޅާފައިވާ މިންވަރަށް ބަލާއިރު، ޖަނަވަރީ މަހު އެކަނިވެސް 2،200 އަށްވުރެ ގިނަ ކޯލު މިނިސްޓްރީއަށް ލިބިފައިވެއެވެ. އޭގެ ތެރެއިން ޗައިލް ހެލްޕްލައިން 1412 އަށް 1964 ކޯލު ލިބިފައިވާއިރު، މީގެ ތެރޭގައި ކުޑަކުދިންގެ ފަރާތުން ލިބުނު 97 ކޯލު ހިމެނެއެވެ. އަދި ބޮޑެތި މީހުންގެ ފަރާތުން 1600 އަށްވުރެ ގިނަ ކޯލު ލިބިފައިވާއިރު، ކާކުކަން ނޭނގޭ ގޮތަށް 216 ކޯލު ލިބިފައިވާކަމަށް މިނިސްޓްރީން މައުލޫމާތު ދެއެވެ.