މާލެ އާއި ވިލިމާލޭގެ މަގުތަކުގައި ނަން ބޯޑު ހަރުކުރުމުގެ މަސައްކަތް 25 މިލިއަން ރުފިޔާގެ ބޮޑު އަގަކަށް ބަޔަކާ ހަވާލުކޮށްފައިވާ ކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ހަގީގަތާ ހިލާފު ވާހަކަތަކެއް ކަމަށް މާލެ ސިޓީ ކައުންސިލުން ބުނެފިއެވެ.
މިކަމާ ގުޅިގެން ސިޓީ ކައުންސިލުން ނެރުނު ނޫސްބަޔާނެއްގައި ބުނެފައިވަނީ، މީޑިއާތަކުގައި ދައުރުވަމުންދާ 25 މިލިއަން ރުފިޔާގެ އަދަދަކީ މި މަސައްކަތަށް ބީލަން ހުށަހެޅި ހަތް ފަރާތުގެ އަގުތައް އެއްކޮށްލުމުން ޖެހޭ ޖުމްލަ އަދަދު ކަމަށެވެ. ކައުންސިލުން ހާމަކުރި ގޮތުގައި މި މަސައްކަތް ހަވާލުކޮށްފައިވަނީ އެއް ފަރާތަކަށެވެ. އެއީ ބީލަމުގެ އުސޫލުން އެންމެ މަތިން މާކްސް ލިބުނު ފަރާތް ކަމަށްވާއިރު، އެ ފަރާތުން ހުށަހަޅާފައިވަނީ 3.9 މިލިއަން ރުފިޔާއެވެ. އެހެންކަމުން މިއީ 25 މިލިއަން ރުފިޔާގެ މަޝްރޫއެއް ކަމަށް ބުނެ ދައްކާ ވާހަކައިގައި އެއްވެސް އަސްލެއް ނެތްކަން ކައުންސިލުން ވަނީ ފާހަގަކޮށްފައެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލޭގެ މޭޔަރުކަމުގައި ހުންނެވިއިރު، 2021 ވަނަ އަހަރުގެ މެއި މަހު އެކުލަވާލައި ފާސްކޮށްފައިވާ ސްޓްރެޓީޖިކް އެކްޝަން ޕްލޭންގެ ދަށުން ކުރިއަށް ގެންދާ މުހިންމު މަސައްކަތެކެވެ. މިދިޔަ އަހަރުގެ އޮކްޓޫބަރު މަހު އިއުލާންކުރި މި މަސައްކަތަށް ހަތް ފަރާތަކުން ކުރިމަތިލި ނަމަވެސް، މަސައްކަތް ހަވާލުކޮށްފައިވަނީ ހުރިހާ އުސޫލުތަކެއް ފުރިހަމަކުރުމަށްފަހު ކަމަށް ކައުންސިލުން ކަށަވަރުކޮށްދެއެވެ.
ޑެޕިއުޓީ މޭޔަރު މުހައްމަދު އަރީޝްއާ ހަވާލާދީ ފެތުރުނު މި މައުލޫމާތުތަކާ ގުޅިގެން ކައުންސިލްގެ ބަޔާނުގައި ވަނީ ނުސީދާކޮށް އޭނާއަށް ފާޑުކިޔާފައެވެ. އެގޮތުން، ކައުންސިލްގެ ޖަލްސާތަކަށް ފަރުވާތެރިކަމާއެކު ހާޒިރުވެ ވަޑައިގަންނަވާނަމަ ކަންކަން ހިނގާ ގޮތް އޮޅުމެއް ނެތި ސާފުވެވަޑައިގަންނަވާނެ ކަމަށް ބަޔާނުގައި ވެއެވެ. އަދި ކައުންސިލާއި މުވައްޒަފުން ބަދުނާމުވާ ގޮތަށް މިފަދަ ދޮގު މައުލޫމާތު ފެތުރުމަކީ ކުށްވެރިކުރާ ކަމެއް ކަމަށާއި، ކައުންސިލްގެ ހުރިހާ ކަމެއްވެސް ކުރިއަށްދަނީ ހާމަކަން ބޮޑު ގޮތެއްގައި ގަވާއިދުތަކާ އެއްގޮތަށް ކަމުގެ ޔަގީންކަން އެ އިދާރާއިން ވަނީ ދީފައެވެ.
ކޮމެންޓު ފޮނުވާ