އެމެރިކާގެ ރައީސް ޑޮނަލްޑް ޓްރަމްޕް އިސްނަގައިގެން، ޣައްޒާގެ ކަންކަން ހިންގުމަށްޓަކައި އުފެއްދުމަށް ނިންމާފައިވާ "ބޯޑު އޮފް ޕީސް" ގައި ބައިވެރިވުމަށް ދިން ދައުވަތު، އިސްލާމީ ބޮޑެތި ހަތް ގައުމަކުން ގަބޫލުކޮށްފިއެވެ. މި ބޯޑުގައި ބައިވެރިވުމަށް އެންމެ ފުރަތަމަ ޚާއްސަ ދައުވަތެއް އަރުވާފައިވަނީ އެކުވެރި އަރަބި އިމާރާތް (ޔޫއޭއީ) އަށެވެ. ނަމަވެސް މިހާރު މި ދައުވަތު ގަބޫލުކޮށް، މި މުހިންމު ބޯޑުގައި ބައިވެރިވުމަށް އެއްބަސްވެފައިވާ ގައުމުތަކުގެ ތެރޭގައި ސައުދީ އަރަބިއްޔާ، ތުރުކީވިލާތް، މިސްރު، އުރުދުން، އިންޑޮނޭޝިއާ، ޕާކިސްތާން އަދި ގަތަރު ހިމެނޭކަން ވަނީ ހާމަވެފައެވެ.
މި ބޯޑު އެކުލަވާލުމުގެ މަސައްކަތް ފެށިގެން ދިޔައީ، އިސްރާއީލުން ޣައްޒާއަށް ދެމުންދިޔަ ހަމަލާތައް ހުއްޓުވުމަށް ހަމާސްއާއެކު ވެވުނު ހަނގުރާމަ ހުއްޓާލުމުގެ އެއްބަސްވުމުގެ ދެވަނަ ފިޔަވަހީގެ ދަށުންނެވެ. މިދިޔަ ހުކުރު ދުވަހު ރައީސް ޓްރަމްޕް އިއުލާންކުރެއްވި މި އިސްނެގުމުގެ މައިގަނޑު މަގުސަދަކީ، ހަނގުރާމައިގެ ސަބަބުން ސުންނާފަތިވެފައިވާ ޣައްޒާ އަލުން އާރާސްތުކުރުމާއި، އެ ސަރަހައްދުގެ ވެރިކަން ހިންގުމުގެ ނިޒާމު ހަރުދަނާކުރުމެވެ.
މީގެ އިތުރުން، ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، ޣައްޒާއަށް ބޭނުންވާ އިންވެސްޓްމަންޓްތައް ގެނައުމާއި، މާލީ އެހީތެރިކަން ފޯރުކޮށްދިނުމުގެ ކަންކަން (ކެޕިޓަލް މޮބިލައިޒޭޝަން) ބެލެހެއްޓުމަކީވެސް މި ބޯޑުގެ މުހިންމު ޒިންމާތަކުގެ ތެރޭގައި ހިމެނޭ ކަމެކެވެ. މުސްލިމް ގައުމުތަކުން މިކަމުގައި ބައިވެރިވުމަކީ ޣައްޒާގެ ރައްޔިތުންނަށް ލިބިގެންދާނެ އުންމީދެއް ކަމުގައި މަސްރަހު ދިރާސާކުރާ ފަރާތްތަކުން ދެކެއެވެ.
ކޮމެންޓު ފޮނުވާ