ދީނާ ޚިލާފު ކަންކަމަށް އަރައިގަތުމަށް ހިތްވަރުދީ، އެފަދަ ކަންކަމަށް ގޮވާލާ ސިޔާސީ ފިކުރުތަކަށް، ސައްތައިން ސައްތަ އިސްލާމީ މި މުޖުތަމަޢުގައި އެއްވެސް ފުރުޞަތެއް ދީގެން ނުވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީ.އެން.ސީ) ގެ އޮފީސް ހުޅުވުމަށް ރޭ ބޭއްވި ޚާއްސަ ޙަފުލާގައި ވާހަކަފުޅުދައްކަވަމުންނެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، ޖުވާކުޅުމަކީ ޖިނާޢީ ކުށެއްކަމުގައި ކަނޑައެޅުމަށް ސަރުކާރުން ޤާނޫނުލްއުޤޫބާތަށް ގެންނަން ހުށަހެޅި އިޞްލާޙާ ގުޅިގެން އިދިކޮޅު ބައެއް ފަރާތްތަކުން ހިތްހަމަނުޖެހުން ފާޅުކުރަމުންދާ ކަމަށެވެ. މިފަދަ ދީނާ ޚިލާފު ކަންކަމަށް ހިތްވަރުދޭ ފިކުރުތަކުގައި މަސައްކަތްކުރާ ފަރާތްތަކަށް އިންތިޚާބުތަކުން ފުރުޞަތު ދިނުމަކީ، ރައްޔިތުން އަމިއްލައަށް ކުރާ ވަރަށް ބޮޑު ގޯހެއްކަމުގައި އެމަނިކުފާނު ސިފަކުރެއްވިއެވެ. އަދި ސައްތައިން ސައްތަ އިސްލާމީ ޤައުމެއްގެ ހުރިހާ އާދަކާދައެއްވެސް ހުންނަންޖެހޭނީ އިސްލާމީ އުޞޫލުތަކާ އެއްގޮތަށް ކަމަށާއި، ޤައުމު އިޞްލާޙުކުރެވޭނީ ފަރުދުންގެ ވިސްނުން އެގޮތަށް ބައްޓަންކޮށްގެންކަން ރައީސް ހަނދުމަފުޅުކޮށްދެއްވިއެވެ.
މި ސަރުކާރުގެ އެންމެ ބޮޑު އަމާޒަކީ އިސްލާމްދީނަށް ނަޞްރުދީ، ދީނީ ހަމަތަކުގެ މަތިން ކަންކަން ބައްޓަންކުރުންކަން ފާހަގަކުރައްވައި، ސަރުކާރުން އަޅުއްވާފައިވާ ބައެއް ހަރުދަނާ ފިޔަވަޅުތަކަށް އެމަނިކުފާނު އަލިއަޅުއްވާލެއްވިއެވެ. އެގޮތުން، މަސާޖު ޕާލަރުތަކުގެ ނަމުގައި ބަދުއަޚުލާޤީ ޢަމަލުތައް ހިންގާ ތަންތަން ހުއްޓުވުމަށް ފެށި މަސައްކަތުގެ ތެރެއިން، ވޭތުވެދިޔަ އެއް މަސްދުވަހުގެ ތެރޭގައި މާލެއިން އެކަނިވެސް އެފަދަ 104 ތަނެއް ބަންދުކުރެވިފައިވާކަން ފާހަގަކުރެއްވިއެވެ. މީގެއިތުރުން، މަސްތުވާތަކެތީގެ މައްސަލަ ޙައްލުކުރުމަށްޓަކައި، ވަކި މިންވަރަކަށްވުރެ ގިނައިން ޑްރަގް ޓްރެފިކްކުރާ ފަރާތްތަކަށް މަރުގެ އަދަބު ދެވޭގޮތަށް ޤާނޫނު އިޞްލާޙުކޮށް ތަސްދީޤުކުރައްވާފައިވާކަންވެސް ރައީސް ވިދާޅުވިއެވެ.
ރައީސްގެ ވާހަކަފުޅުގައި އިތުރަށް ވިދާޅުވީ، ލޯކަލް ޓޫރިޒަމާއި ސަފާރީތައް ހިންގުމުގެ ޤަވާއިދުތައް އިޞްލާޙުކޮށް، މީހުން ދިރިއުޅޭ ސަރަޙައްދުތަކުގައި ގެންގުޅެންޖެހޭ މިންގަނޑުތައް ހިމެނޭހެން ވަރަށް އަވަހަށް އައު ޤަވާއިދުތައް ގެޒެޓުކުރައްވާނެ ކަމަށެވެ. އަދި މި އިޞްލާޙީ ބަދަލުތައް ތަންފީޒުކުރުމުގައި ކައުންސިލްތަކުގެ ދައުރު މުހިންމުކަން ފާހަގަކުރެއްވިއެވެ. ވާހަކަފުޅު ނިންމަވާލައްވަމުން ރައީސް ވަނީ، ސިޔާސީ އޮއިވަރުގައި ޖެހި ދިވެހިންގެ ޝަޚްޞިއްޔަތު ދޫކޮށްނުލުމަށް ނަސޭޙަތްތެރިވެވަޑައިގެންފައެވެ. އަދި ސިޔާސީ މީހުން ދައްކާ ވާހަކަތައް ޤަބޫލުކުރުމުގެ ކުރިން، ތަޢައްޞަބުން އެއްކިބާވެ، ބުއްދީގެ ބޭނުންކޮށްގެން ކަންކަމާމެދު ވިސްނުމަށް އެމަނިކުފާނު އިލްތިމާސްކުރެއްވިއެވެ.
ކޮމެންޓު ފޮނުވާ