ދިވެހިރާއްޖޭގައި ސަސްޓެއިނަބަލް ޓައުންޝިޕްއެއްގެ ގޮތުގައި ތަރައްގީކުރާ "ޕްރޮޖެކްޓް އައިލާ" އަށް ސްޕެޝަލް އިކޮނޮމިކް ޒޯނުގެ ދަރަޖަ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ދެއްވައިފިއެވެ.
މި ޕްރޮޖެކްޓް ތަރައްގީކުރުމަށް ކްރިސްޓަލް ހޯލްޑިންގ ޕްރައިވެޓް ލިމިޓެޑާއި ބޯޑް އޮފް އިންވެސްޓްމަންޓްސްއާ ދެމެދު މިއަދު އިންވެސްޓްމަންޓް އެއްބަސްވުމެއްގައި ސޮއިކުރެވިއްޖެއެވެ. މި ޒޯނުގައި ކުރުމަށް ހުއްދަދީފައިވާ ކަންކަމުގެ ތެރޭގައި ލަގްޒަރީ ވިލާ އަދި ހައި-އެންޑް ހޯމްސްގެ ތަރައްގީ، ބައިނަލްއަގްވާމީ ފެންވަރުގެ ހެލްތުކެއާ އަދި ހޮސްޕިޓަލިޓީ ތަމްރީން މަރުކަޒުތައް، އަލްޓްރާ ލަގްޒަރީ ރިސޯޓް، ހޮޓެލާއި މެރީނާ ހިމެނެއެވެ.
މީގެ އިތުރުން މި ޒޯނުގައި ބޭނުންކުރާ ހަކަތައިގެ މަދުވެގެން 60 ޕަސެންޓަކީ އިއާދަކުރެވޭ ހަކަތަ ކަމުގައި ކަނޑައަޅާފައިވާއިރު، ދެމެހެއްޓެނިވި ދަނޑުވެރިކަމުގެ ވަސީލަތްތައް ގާއިމުކުރުމާއި ކާބޯތަކެތީގެ އުފެއްދުން އިތުރުކުރުމަށް ވަނީ ހާއްސަ ސަމާލުކަމެއް ދީފައެވެ. ޒޯނުގައި ދިރިއުޅޭ އަދި މަސައްކަތްކުރާ މީހުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް ވަނީ ހަމަޖެހިފައެވެ. ސްޕެޝަލް އިކޮނޮމިކް ޒޯނުގެ ގާނޫނުގެ ދަށުން މި ޕްރޮޖެކްޓަށް ހާއްސަ އިނާޔަތްތަކާއި ޓެކްސް ލުއިތައް ވަނީ ދީފައެވެ.
ކޮމެންޓު ފޮނުވާ