ސަރުކާރުން ދައްކަން ޖެހޭ ފައިސާއިން ޓެކްސް ކަނޑައިދިނުމަށް ވިޔަފާރިވެރިން އެދިއްޖެ

ކުދި އަދި މެދު ފަންތީގެ ވިޔަފާރިވެރިންނާ ރައީސް ޑރ. މުހައްމަދު މުއިއްޒު މިރޭ ބައްދަލުކުރައްވަމުން ގެންދަވާ ބައްދަލުކުރެއްވުމުގައި، ސަރުކާރު ކުންފުނިތަކުން ދައްކަން ޖެހޭ ފައިސާއިން، ދައުލަތަށް ދައްކަން ޖެހޭ ޓެކްސް ކަނޑައިދިނުމަށް އެދިފައިވާކަން ފާހަގަވެއްޖެއެވެ.

ސޯޝަލް ސެންޓަރުގައި ކުރިއަށްދާ ބައްދަލުކުރެއްވުމުގައި ވިޔަފާރިވެރިން ވަނީ ކުރީ ސަރުކާރުގައި ކުރި މަސައްކަތްތަކަށް ލިބެން ޖެހޭ ފައިސާ އަދިވެސް ނުލިބޭ ކަމުގެ ޝަކުވާ އުފުލާފައެވެ. އެހެން ނަމަވެސް މީރާއަށް ދައްކަން ޖެހޭ ޓެކްސް އާއި ފީތައް ގަވައިދުން ދައްކަން ޖެހޭކަމަށާއި، އެކަމުގެ ސަބަބުން ވިޔަފާރިތަކަށް ބޮޑެތި ދަތިތައް ކުރިމަތިވަމުން އަންނަ ކަމަށް ވިޔަފާރިވެރިން ފާހަގަކުރިއެވެ.

ވިޔަފާރިވެރިއަކު ބުނީ ފައިސާ ނުލިބުނު ނަމަވެސް ޓެކްސް ދައްކަން ޖެހުމުގެ ސަބަބުން ޖޫރިމަނާތައް އަރަމުން ދާއިރު، މާލީ ދަތިކަމުގެ ތެރެއިން ހަރު މުދާ ވިއްކާ ހަލަތަށް ކަންތައް ގޮސްފައިވާ ކަމަށެވެ. އެހެންވީމާ ސަރުކާރުގެ އެސްއޯއީތަކުން ދައްކަން ހުރި ފައިސާއިން މީރާއަށް ދައްކަން ޖެހޭ ޓެކްސް ލާޖައްސައި އުނިކުރެވޭނެ އިންތިޒާމެއް ގާނޫނުގެ ތެރެއިން ހަމަޖައްސައިދިނުމަށް އޭނާ އެދިއްޖެއެވެ.

އަނެއް ވިޔަފާރިވެރިއަކު ބުނީ އޭނާގެ ވިޔަފާރިއަށް ސަރުކާރުން ލިބެން ޖެހޭ 1.3 މިލިއަން ރުފިޔާ ނުލިބި އޮންނަތާ ދެ އަހަރާއި ބައި ވެއްޖެ ކަމަށެވެ. ވިޔަފާރިތަކަށް ދައްކަން ޖެހޭ ފައިސާ ނުދީ، ދައުލަތުގެ ބަޖެޓުން މަސްވެރިންނަށް ސަބްސިޑީ ދޭތީ އޭނާ ފާޑުކިޔައި، ސަބްސިޑީއެއް ބޭނުމެއް ނޫން ކަމަށާއި، ކުރާ މަސައްކަތުގެ ފައިސާ 15 ދުވަސް ތެރޭ ދިނުމުން ފުދޭނެ ކަމަށް ބުންޏެވެ.

ރައީސް މުއިއްޒު މިދިޔަ މަހުގެ 14 ވަނަ ދުވަހު ވިދާޅުވީ ކުރީ ސަރުކާރުން އެކި ކުންފުނިތަކަށް ދޭން ޖެހޭ ފައިސާގެ ތެރެއިން، ނުދައްކާ ހުރި 440 މިލިއަނަށް ވުރެ ގިނަ ރުފިޔާ ދައްކާފައިވާ ކަމަށާއި، ހުރިހާ ބިލެއް ދައްކާ ނިމެންދެން ކޮންމެ ދުވަހަކު ވެސް މި ފައިސާ ދެއްކުން ކުރިއަށްދާނެ ކަމަށެވެ.