ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން ތަރައްގީކުރި 4000 ފްލެޓް ލިބުނު ފަރާތްތަކުން ދައްކަން ޖެހޭ 25،000 ރުފިޔާގެ ޑައުންޕޭމަންޓާއި މަހުން މަހަށް ދައްކަން ޖެހޭ ކުއްޔަށް ލުއިކަން ހޯދައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ގަލޮޅު ރައްޔިތުންނާ އިމާދުއްދީން ސްކޫލުގައި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެތަންތަކަށް ކަރަންޓާއި ފެން ގުޅުއްވުމުގެ މަސައްކަތް އަންނަ ހަފްތާގައި ނިންމާލެވޭތޯ މަސައްކަތް ކުރައްވަމުން ގެންދަވާ ކަމަށެވެ. އަދި އާ ދިރާސީ އަހަރު ފެށޭއިރަށް އެތަންތަކަށް ވަދެވޭވަރު ކޮށްދެއްވާނެ ކަމަށް ވެސް ރައީސް ވިދާޅުވިއެވެ. ބައްދަލުކުރެއްވުމުގައި ބައިވެރިވި މީހަކު ވަނީ 25،000 ރުފިޔާގެ ޑައުންޕޭމަންޓަކީ ގިނަ ފަރާތްތަކަށް ދައްކަން ދަތި އަދަދެއް ކަމަށް ފާހަގަކޮށް، އެކަމަށް ބަދަލެއް ގެނައުމަށް އެދިފައެވެ. މި ކަންބޮޑުވުމަށް ރައީސް ވިދާޅުވީ، ޑައުންޕޭމަންޓް ކުޑަކުރުމާއި މަހުން މަހަށް ދައްކަން ޖެހޭ ކުލީގެ މިންވަރަށް ގެނެވޭނެ ބަދަލުތަކެއް ސީރިއަސްކޮށް ބަލައި، އެންމެ ރަނގަޅު ހައްލު ހޯދައިދެއްވާނެ ކަމަށެވެ.
3 ކޮޓަރީގެ ފްލެޓުތަކަށް 25،000 ރުފިޔާ އަދި 2 ކޮޓަރީގެ ފްލެޓުތަކަށް 15،000 ރުފިޔާގެ ޑައުންޕޭމަންޓް ދައްކަން ޖެހޭކަން ފާހަގަކުރެވެއެވެ.
ކޮމެންޓު ފޮނުވާ