އދ.ގެ ޢާންމު މަޖިލީހުގައި މިއަދު ވާހަކަފުޅު ދައްކަވަމުން ފްރާންސްގެ ރައީސް އެމަނުއެލް މެކްރޯން ވަނީ ފަލަސްޠީނު ދައުލަތް ފްރާންސްއިން ރަސްމީކޮށް ޤަބޫލުކުރާކަމަށް އިޢުލާން ކުރައްވާފައެވެ. މިއީ ފަލަސްޠީނު-އިސްރާއީލު ކޮންފްލިކްޓަށް ދެ ދައުލަތުގެ ޙައްލެއް ހޯދުމަށް ކުރެވޭ މަސައްކަތްތަކަށް މުހިންމު ކުރިއެރުމެކެވެ.
ރައީސް މެކްރޯން ތަޤުރީރު ކުރައްވަމުން ފަލަސްޠީނުގައި ދިގުލައިގެން ހިނގަމުންދާ ހަނގުރާމައާއި އިންސާނީ ކާރިސާގެ ހާލަތު ފާހަގަކުރައްވައި، ސުލްޙަ ޤާއިމުކުރުމުގެ އަވަސް ބޭނުން އޮތްކަން ބާރުއަޅުއްވައިލެއްވިއެވެ. "ރަހީނުން ދޫކޮށްލުމާއި، ހަނގުރާމަ ހުއްޓުވުމާއި، ރައްޔިތުން ފިލައިގެން ދިއުން ނިމުމަކަށް ގެނައުމުގެ ވަގުތު މިހާރު އައިސްޖެހިއްޖެ،" ކަމަށް މެކްރޯން ވިދާޅުވިއެވެ.
ސުލްޙަ ޤާއިމުކުރުމުގެ ފުރުޞަތު ވަރަށް ބޮޑަށް ހަނިވެފައިވާކަން ފާހަގަކުރައްވަމުން ރައީސް މެކްރޯން ވިދާޅުވީ، ކޮންމެ ތަނެއްގައިވެސް އިތުރު ނުރައްކަލުގެ ބިރު އޮތް ނަމަވެސް، މިހާރު މިވަނީ ސުލްޙައަށް މަސައްކަތް ކުރަންޖެހޭ ވަގުތު ކަމަށެވެ. އަދި ސުލްޙައަށް މަގުފަހިކުރުމާއި ދެ ދައުލަތުގެ ޙައްލެއް ހޯދުމުގެ ފުރުޞަތު ދެމެހެއްޓުމަށްޓަކައި ކުރެވެން ހުރި ހުރިހާ ކަމެއް ކުރުމަކީ ބައިނަލްއަޤްވާމީ މުޖުތަމަޢުގެ ޒިންމާއެއް ކަމަށް އެމަނިކުފާނު ވިދާޅުވިއެވެ.
ތަޤުރީރުގެ ނިޔަލަށް ރައީސް މެކްރޯން ވިދާޅުވީ "މިއަދު މިތަނުގައި އަޅުގަނޑު އިޢުލާނުކުރަނީ ފްރާންސްއިން ފަލަސްޠީނު ދައުލަތް ޤަބޫލުކުރާ ކަމުގައި" އެވެ. މި އިޢުލާނާއެކު އދ.ގެ ޢާންމު މަޖިލީހުގެ ތެރެއިން ބޮޑު ތަރުހީބެއް ލިބުނުކަން ފާހަގަކުރެވުނެވެ.
ފްރާންސްގެ މި ތާރީޚީ ނިންމުމުން ދުނިޔޭގެ އެހެން ޤައުމުތަކުންވެސް ފަލަސްޠީނު ދައުލަތް ޤަބޫލުކުރުމަށް ހިތްވަރު ލިބިގެންދާނެ ކަމަށް ބައިނަލްއަޤްވާމީ ގުޅުންތަކުގެ ޚާއްޞިންތަކުން ބެލެވެއެވެ. މީގެ އިތުރުން، ފަލަސްޠީނު ރައްޔިތުންނަށް އަމިއްލަ މިނިވަން ދައުލަތެއް ޤާއިމުކުރުމުގެ އުންމީދު އިތުރަށް ވަރުގަދަވެގެންދާނެ ކަމަށްވެސް ޤަބޫލުކުރެވެއެވެ.
ފަލަސްޠީނު ދައުލަތް ޤަބޫލުކުރާ ގައުމުތަކުގެ ތެރެއަށް ފްރާންސް ވަނުމުން، އިސްރާއީލު-ފަލަސްޠީނު މައްސަލަ ޙައްލުކުރުމަށް ބައިނަލްއަޤްވާމީ މުޖުތަމަޢުގެ ފަރާތުން ކުރަމުންދާ މަސައްކަތްތަކަށް އާ ރޫޙެއް ލިބިގެންދާނެ ކަމަށް ގަބޫލުކުރެވެއެވެ.
ކޮމެންޓު ފޮނުވާ