ރާއްޖޭގައި ދިރިއުޅޭ ބިދޭސީންގެ ބައޯމެޓްރިކް މައުލޫމާތު އެއްކުރުމަށް ހޯމްލޭންޑް ސެކިއުރިޓީ މިނިސްޓްރީން ކުރިއަށް ގެންދާ އޮޕަރޭޝަން ކުރަނގިގެ ދަށުން މިހާތަނަށް 178,982 ބިދޭސީންގެ މައުލޫމާތު އެއްކުރެވިފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިރޭ ފ. ނިލަންދޫ ރައްޔިތުންނާ ބައްދަލުކުރެއްވުމުގައި ރައީސް ވިދާޅުވީ، މި އޮޕަރޭޝަންގެ ތެރެއިން ރާއްޖޭގެ އެކި ކަންކޮޅުތަކުގައި ދިރިއުޅޭ ބިދޭސީންގެ ފޮޓޯއާއި ދިހަ އިނގިލީގެ ނިޝާން ފަދަ ބައޯމެޓްރިކް ޑޭޓާ ނަގައި، ގަވާއިދާ ހިލާފަށް އުޅޭ މީހުން ދެނެގަތުމުގެ މަސައްކަތް ކާމިޔާބުކަމާއެކު ކުރިއަށްދާ ކަމަށެވެ.
ރާއްޖޭގައި ދެ ލައްކައެއްހާ ބިދޭސީން އުޅޭކަން އެނގިފައިވާ ކަމަށާއި، މިކަމަކީ މީގެ ކުރިން އެއްވެސް ސަރުކާރަކަށް ހައްލުކުރެވިފައިނުވާ މައްސަލައެއް ކަމަށް ރައީސް ފާހަގަކުރެއްވިއެވެ. އަދި މިސަރުކާރުން ވޭތުވެދިޔަ ކުރު މުއްދަތުގެ ތެރޭގައި އެކަނިވެސް 8,609 ބިދޭސީން ޑީޕޯޓް ކޮށްފައިވާ ކަމަށް އެމަނިކުފާނު ހާމަކުރެއްވިއެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމުގެ އެންމެ މުހިންމު ފިޔަވަޅަކީ އެމީހުންގެ ރެކޯޑު އެއްކުރުން ކަމުގައި ރައީސް ވިދާޅުވެ، މި މަސައްކަތުގައި މިހާތަނަށް ލިބިފައިވާ ކާމިޔާބީ ފާހަގަކުރެއްވިއެވެ.
މީގެ އިތުރުން، ބިދޭސީން ހިންގާ ގަވާއިދާ ހިލާފު ވިޔަފާރިތައް ބަންދުކުރުމުގެ ހާއްސަ އޮޕަރޭޝަނެއް މާދަމާ މުޅި ރާއްޖޭގައި ފެށުމަށް ހަމަޖެހިފައިވާ ކަން ރައީސް އިއުލާން ކުރެއްވިއެވެ. މި އޮޕަރޭޝަންގެ ބޭނުމަކީ ނުގަވާއިދުން ހިންގާ ވިޔަފާރިތައް ހޯދައި ވަގުތުން ފިޔަވަޅު އެޅުން ކަމަށާއި، މިކަމުގެ ސަބަބުން ދިވެހި ރައްޔިތުންނަށް ވިޔަފާރި ކުރުމުގެ ހައްގު ފުރުސަތުތައް އަނބުރާ ހޯދައިދެވޭނެ ކަމަށް ރައީސް ވިދާޅުވިއެވެ.
ބިދޭސީން ގަވާއިދާ ހިލާފަށް ވިޔަފާރި ކުރުމަށް ފުރުސަތު ލިބެނީ ބައެއް ދިވެހިން އެކަމަށް އެހީތެރިވާތީ ކަމަށް ރައީސް ފާހަގަކުރެއްވި އެވެ. އެހެންކަމުން، ބިދޭސީންނަށް ނުގަވާއިދުން ވިޔަފާރިތައް ހިންގުމަށް ފުރުސަތު ނުދިނުމަށާއި، މިފަދަ ކަންކަމުގައި އެއްބާރުލުން ނުދިނުމަށް ރައީސް ވަނީ ރައްޔިތުންނަށް އިލްތިމާސް ކުރައްވާފައެވެ.
ކޮމެންޓު ފޮނުވާ