ސޯޝަލް މީޑިއާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ނުރައްކާތެރި އިންޒާރެއް ދިން މައްސަލާގައި ތ. ތިމަރަފުށީ މަލަސް، މަސީހު މޫސާ (25) ހައްޔަރުކޮށްފައިވާ ކަމަށް ފުލުހުން ހާމަކޮށްފި އެވެ.
މި މައްސަލާ ދިމާވީ ފޭސްބުކްގައި "މަސީހް މޫސާ" ގެ ނަމުން ހަރަކާތްތެރިވާ އެކައުންޓަކުން ރައީސަށް ނުރައްކާތެރި މެސެޖެއް ފޮނުވުމުންނެވެ. މި އިންޒާރު ދީފައިވަނީ މަސްތުވާތަކެތީގެ ވިޔަފާރިކުރާ ފަރާތްތަކަށް މަރުގެ ހުކުމް ތަންފީޒުކުރުމާ ގުޅޭ ބިލެއް މަޖިލީހަށް ހުށަހެޅިފައިވާއިރު، އެ ބިލު އިތުރަށް ދިރާސާކުރުމަށް ކަމާބެހޭ އިދާރާތަކަށް ރައީސް އެންގެވި ކަމުގެ ޚަބަރެއް ނޫހެއްގައި ޝާއިއުވުމާ ގުޅިގެންނެވެ.
ފުލުހުން ހާމަކުރިގޮތުން މި މައްސަލާގައި މަސީހު މޫސާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ. އަދި ތަހުގީގަށް ބޭނުންވާ މަޢުލޫމާތު ހޯދުމުގެ ގޮތުން އޭނާގެ ފޯނުވެސް ފުލުހުން ހިފަހައްޓާފައިވާ ކަމަށް ފުލުހުން ބުނެ އެވެ.
ސޯޝަލް މީޑިއާގައި ދައުލަތުގެ އިސްވެރިންނަށް ނުރައްކާތެރި އިންޒާރުތައް ދިނުމަކީ ޤާނޫނީ ގޮތުން ވަރަށް ބޮޑު ކުށެއް ކަމަށާއި، މިފަދަ ޢަމަލުތަކާ ދެކޮޅަށް ފުލުހުން ހަރުދަނާ ފިޔަވަޅުތައް އަޅަމުންދާ ކަމަށް ފުލުހުން ވަނީ ހާމަކޮށްފަ އެވެ.
ކޮމެންޓު ފޮނުވާ