ދިވެހި ގައުމިއްޔަތުގެ މުހިންމު ދާއިރާތަކުގައި ޒުވާނުން ތަމްރީން ކުރުމަށް ރާވާފައިވާ "ކަޅުއޮށްފުންމި ފަށަން" ޕްރޮގްރާމް އިއްޔެ ރަސްމީކޮށް ފެށިއްޖެއެވެ. ގައުމީ ދާރުލް އާސާރުގައި ބޭއްވުނު ހާއްސަ ރަސްމިއްޔާތެއްގައި މި ޕްރޮގްރާމް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމެވެ.
މި ޕްރޮގްރާމުގެ ފުރަތަމަ ސެޝަންގައި ދިވެހި ގައުމިއްޔަތުގެ އިސްވާރުން ބައިވެރިވެވަޑައިގެން، ތަމްރީންވެރިންނާ ހިއްސާކުރެއްވީ އެކި ދާއިރާތަކުގެ މުހިންމު މައުލޫމާތާއި ހުނަރުތަކެވެ. މި ސެޝަންގައި ބައިވެރިވެވަޑައިގަތް އިސްވާރުންގެ ތެރޭގައި ދިވެހި ތާރީހުގެ އިސްވާރު އަލްއުސްތާޒު ކަށިމާ އަހުމަދު ޝާކިރު، ދިވެހި ތަރިކައިގެ އިސްވާރު ހަސަން ޒަރީރު އަދި ދިވެހި ބަހުގެ އިސްވާރު މަރިޔަމް ތައުފީގާ ހިމެނިވަޑައިގަންނަވައެވެ.
ތިން މަސް ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމުގައި ތަމްރީން ދެވޭނީ ދިވެހިބަސް، ދިވެހި ތާރީހު، ދިވެހި ފަންނު، ދިވެހި ޖިއޮގުރަފީ އަދި ޑިޖިޓަލް ދާއިރާ ހިމެނޭ ގޮތަށް ދިވެހި ގައުމިއްޔަތުގެ މުހިންމު ދާއިރާތަކުގައެވެ. މި ދާއިރާތަކުގައި ތަމްރީން ދެއްވާނީ ކޮންމެ ދާއިރާއެއްގައި ވެސް ތަޖުރިބާކާރު އަދި މާހިރު ދިވެހި އިސްވާރުންނެވެ.
ރަސްމިއްޔާތުގައި ވާހަކަފުޅު ދައްކަވަމުން ވަޒީރު އާދަމް ނަސީރު އިބްރާހީމް ފާހަގަކުރެއްވީ، ދިވެހިވަންތަކަމުގެ ކޮންމެ ދާއިރާއެއްގައި ވެސް މިހާރު ކުރަންޖެހޭ މުހިންމު މަސައްކަތްތަކެއް އޮތް ކަމަށެވެ. އަދި މި ޕްރޮގްރާމުގެ ސަބަބުން ދިވެހި ގައުމިއްޔަތުގެ އެކި ރޮނގުތަކުގައި ފަންނުވެރި، ހަރަކާތްތެރި ޒުވާނުންތަކެއް ބިނާވެގެންދާނެ ކަމަށް އުންމީދު ކުރައްވާ ކަމަށް ވެސް ވަޒީރު ވިދާޅުވިއެވެ.
"ކަޅުއޮށްފުންމި ފަށަން" އަކީ ދިވެހި ގައުމިއްޔަތު ދިރުވައި، އަންނަން އޮތް ޖީލުތަކަށް ދިވެހިވަންތަ ތަރިކަ ފޯރުކޮށްދިނުމަށް ޓަކައި ރާވާފައިވާ ސިލްސިލާ ޕްރޮގްރާމެކެވެ. މި ޕްރޮގްރާމުގެ ފުރަތަމަ ބުރުގައި ބައިވެރިވާ ތަމްރީންވެރިންނަށް ދިވެހި ގައުމިއްޔަތުގެ އެކި ދާއިރާތަކުގައި ޢަމަލީ ގޮތުން މަސައްކަތް ކުރުމުގެ ފުރިހަމަ ފުރުޞަތު ލިބިގެންދާނެއެވެ.
ކޮމެންޓު ފޮނުވާ