މާލެ ސަރަހައްދުގައި މިއަދު ހެނދުނު ދިމާވި ބޮޑު ކަރަންޓު ކެނޑުމުގެ ސަބަބުން ސްކޫލްތަކުގެ މެންދުރުފަހު ސެޝަންގެ ކިޔެވުން ހުއްޓާލަން ޖެހިއްޖެއެވެ. މާލެ، ހުޅުމާލެ އަދި ވެލާނާ އިންޓަރނޭޝަނަލް އެއާޕޯޓުގައިވެސް ކަރަންޓު ކެނޑި، ޚިދުމަތްތައް ފޯރުކޮށްދިނުމުގައި ވަނީ ދަތިތަކެއް ކުރިމަތިވެފައެވެ.
ސްކޫލްތަކުގައި ހެނދުނު ސެޝަން ފެށިފައި ވަނިކޮށް 1:00 ގައި ކަރަންޓު ކެނޑުމުން ދަރިވަރުން ގެއަށް ފޮނުވާލައިފައިވާކަމަށް ބެލެނިވެރިން މައުލޫމާތު ދެއެވެ. އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، މެންދުރުފަހު ސެޝަން ފެށޭ ވަގުތަށް ވެސް ކަރަންޓު ލިބޭނެކަމުގެ ޔަގީންކަމެއް ނެތުމުން، އެ ސެޝަންގައި ކިޔަވައިދޭން ހަމަޖެހިފައިވާ ސްކޫލްތައް ބަންދުކުރުމަށް ނިންމާފައިވާ ކަމަށެވެ.
ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ދީފައިވާ މައުލޫމާތުގައި ބުނެފައިވަނީ، ކަރަންޓު ކެނޑިފައިވަނީ ހުރިހާ ޖެނެރޭޓަރެއް އެއްފަހަރާ ނިވިގެންކަމަށެވެ. ނަމަވެސް ކަރަންޓު އަލުން ލިބޭނެ ވަގުތެއް ކޮމްޕެނީއަކުން ސާފުކޮށް ބުނެފައެއް ނުވެއެވެ.
މި ހާދިސާގެ ސީރިއަސްކަން ފާހަގަކުރައްވައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މި މައްސަލަ ފުރިހަމައަށް ތަހުގީގުކުރުމަށް އަންގަވާފައެވެ. ރައީސުލްޖުމްހޫރިއްޔާގެ އެންގެވުމާ އެއްގޮތަށް މޯލްޑިވްސް ޕޮލިސް ސަރވިސްއިން ވަނީ މި ހާދިސާއާ ގުޅޭ ތަހުގީގެއް ފަށާފައެވެ.
މާލެ ސަރަހައްދުގައި ކަރަންޓު ކެނޑުމުގެ މިފަދަ ބޮޑު ހާދިސާއެއް ކުރިމަތިވުމުން ދިރިއުޅުމުގެ އެކި ދާއިރާތަކަށް ނޭދެވޭ އަސަރުތަކެއް ކޮށްފައިވާއިރު، ޚާއްސަކޮށް ސްކޫލްތަކުގެ ކިޔެވުމަށް ހުރަސްއެޅި، ވިޔަފާރިތަކާއި އޮފީސްތަކުގެ މަސައްކަތްތައް ހުއްޓިފައިވާކަން ފާހަގަކުރެވެއެވެ.
ކޮމެންޓު ފޮނުވާ