އުތުރުގެ އަތޮޅުތަކުގެ ތެރެއިން ރަށެއްގައި 17 އަހަރުގެ ކުޑަކުއްޖަކަށް ބަޔަކު ޖިންސީ ގޯނާ ކުރި މައްސަލައެއް ފުލުހުން ބަލަން ފަށައިފިއެވެ. ފުލުހުންގެ ފަރާތުން މަޢުލޫމާތު ދެއްވި ގޮތުގައި މި މައްސަލައަކީ ނޯތު ޕޮލިސް ރީޖަން (ނ، ރ، ބ، ޅ) ގައި ހިމެނޭ ރަށެއްގައި ހިނގި ހާދިސާއެކެވެ. އެހެންނަމަވެސް، މި ކުއްޖަކީ ފިރިހެން ކުއްޖެއްކަން ނުވަތަ އަންހެން ކުއްޖެއްކަން އަދި ހާމަކޮށްފައެއް ނުވެއެވެ.
ފުލުހުންގެ ފަރާތުން އިތުރަށް މަޢުލޫމާތު ދިނުމުގައި ވިދާޅުވީ މި މައްސަލަ ފުރަތަމަ ރިޕޯޓުކޮށްފައިވަނީ މިދިޔަ ޖެނުއަރީ މަހުގެ 20 ވަނަ ދުވަހު ކަމަށެވެ. އަދި މިއީ އިތުބާރުކުރެވޭ މަގާމެއްގައި ތިބި ބަޔަކު ކޮށްފައިވާ ކަމެއްކަމަށް ބެލެވޭ ކަމަށް ވެސް ފުލުހުން ވަނީ ހާމަކޮށްފައެވެ. އެހެންނަމަވެސް، މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަން ވެސް ފާހަގަކޮށްފައިވެއެވެ.
މި މައްސަލައިގެ ތަޙުޤީޤު ކުރިއަށްދާ ގޮތާ ބެހޭގޮތުން ސުވާލުކުރުމުން، ފުލުހުން ވިދާޅުވީ ހާދިސާއާ ގުޅުންހުރި އެހެނިހެން އިދާރާތަކާ ގުޅިގެން މައްސަލައިގެ ތަޙުޤީޤު މިހާރުވެސް ކުރިއަށްދާ ކަމަށެވެ. ކުޑަކުދިންނަށް ކުރާ އަނިޔާގެ މައްސަލަތައް ބެލުމުގައި ފުލުހުން ޚާއްސަ އަހައްމިއްޔަތެއް ދޭކަން ވެސް އިސްވެރިޔަކު ފާހަގަކުރެއްވިއެވެ.
ކޮމެންޓު ފޮނުވާ