އައްޑޫ ސިޓީ ހިތަދޫގެ އެކި ސަރަހައްދުތަކުގައި މިއަދު ހެނދުނު 6:20 ގައި ކަރަންޓުގެ ޚިދުމަތް މެދުކެނޑިއްޖެއެވެ. ފެނަކަ ކޯޕަރޭޝަނުން ވިދާޅުވީ މުޅި ހިތަދޫގައި ކަރަންޓް ކެނޑިފައިވަނީ ޓެކްނިކަލް މައްސަލައެއް ދިމާވުމުގެ ސަބަބުން ކަމަށެވެ.
އައްޑޫ ސިޓީގެ ގުޅިފައިވާ ހަތަރު އަވަށަށް ބޭނުންވާ މިންވަރަށް ކަރަންޓް އުފައްދަން ނުކުޅެދި، ލޯޑު ބޮޑުވެ، ދޭތެރެ ދޭތެރެއިން ކަރަންޓް ކެނޑޭ މައްސަލަ އަކީ ހައްލު ނުވެ ގިނަ ދުވަސްތަކެއް ވަންދެން ދިގުލައިގެން ދާ ކަމަކަށް ވެފައިވާ ކަމަށް ރައްޔިތުން ފާހަގަކުރެއެވެ.
ނަމަވެސް އައްޑޫގެ ކަރަންޓް މައްސަލައަށް ދާއިމީ ހައްލެއް ހޯދުމަށްޓަކައި ކުރިއަށް އޮތް 10 އަހަރަށް ބޭނުންވާ މިންވަރަށް ކަރަންޓް ކެޕޭސިޓީ އިތުރުކުރުމަށް ބޮޑު މަޝްރޫއެއް ރާއްވާފައިވާ ކަމަށް ރައީސް ޑރ. މުޙައްމަދު މުއިއްޒު ވަނީ ވިދާޅުވެފައެވެ. މި މަޝްރޫއަށް ބޭނުންވާ ފައިސާ ފިނޭންސް މިނިސްޓްރީގެ ތެރެއިން މިހާރު ހަމަޖެހިފައިވާ ކަމަށާއި، ކަރަންޓް ކެޕޭސިޓީ އިތުރުކުރުމުގެ މަސައްކަތް ކުރިއަށް އޮތް ހަ މަސް ދުވަހުގެ ތެރޭގައި ނިންމޭނެ ކަމަށް ރައީސް ވިދާޅުވިއެވެ.
އައްޑޫގެ ކަރަންޓް މައްސަލަ ހައްލުކުރުމަށްޓަކައި ފެނަކަ ކޯޕަރޭޝަނުން މިދިޔަ އަހަރުގެ އެޕްރީލް 18 ވަނަ ދުވަހު ޗައިނާގެ ކުންފުންޏެއް ކަމަށްވާ ޑޮންފެންގ އިލެކްޓްރިކްއާ މަޝްރޫއެއް ހަވާލުކޮށްފައިވެއެވެ. މި ކުންފުންޏާ ހަވާލުކުރެވިފައިވަނީ 32 މެގަވޮޓްގެ ޕަވަރ ޕްލާންޓެއް ގާއިމުކުރުމާއި ޑިސްޓްރިބިއުޝަން ސިސްޓަމް އަޕްގްރޭޑް ކުރުމުގެ މަސައްކަތެވެ.
ފެނަކަ ކޯޕަރޭޝަނުން މައުލޫމާތު ދެއްވާގޮތުގައި މިއީ ޑޮންފެންގ އިލެކްޓްރިކްއިން ފައިނޭންސް ކުރާ މަޝްރޫއެކެވެ. މި މަޝްރޫއު ފޭސްތަކަކަށް ބަހާލައިގެން ކުރިއަށް ގެންދަން ހަމަޖެހިފައިވާއިރު، ފުރަތަމަ ފޭސްގައި އިންސްޓޯލް ކުރާނީ 9.8 މެގަވޮޓްގެ ދެ ޖެނަރޭޓަރ ސެޓާއި 5.8 މެގަވޮޓްގެ ދެ ޖެނަރޭޓަރ ސެޓެވެ.
ކޮމެންޓު ފޮނުވާ