މާލެއަތޮޅު ހުރާ ކައުންސިލުން އެރަށުގެ ރައްވެހިންގެ ތެރެއިން ޤުރުއާން ހިތުދަސްކޮށް ހާފިޒުކަމުގެ ސަނަދު ހާސިލުކުރާ ކޮންމެ ފަރާތަކަށް 150،000 ރުފިޔާ ދިނުމަށް ނިންމައިފިއެވެ. މިކަން ކައުންސިލުން މިއަދު ނެރުނު އިޢުލާނެއްގައި ވަނީ ހާމަކޮށްފައެވެ.
ކައުންސިލުން ބުނެފައިވާ ގޮތުގައި، މިއީ ހަމައެކަނި ހުރާގެ ރަށްވެހިންނަށް ޚާއްސަކުރެވިފައިވާ ފުރުޞަތެކެވެ. މީގެ އިތުރުން ކައުންސިލުން އިސްނަގައިގެން އެރަށުގައި ޒުވާން ހާފިޒުން ތަމްރީނުކުރުމުގެ ޕްރޮގްރާމެއް ބޭއްވުމަށްވެސް ވަނީ ހަމަޖެހިފައެވެ.
އިޢުލާނުގައި ވާގޮތުން، މި ޕްރޮގްރާމުގައި ބައިވެރިވެ ހާފިޒުކަމުގެ ސަނަދު ހާސިލުކުރާ ފަރާތްތަކަށާއި، އަމިއްލަ ގޮތުން ސަނަދު ހާސިލުކުރާ ހުރާގެ ރަށްވެހިންނަށްވެސް 150،000 ރުފިޔާ ދިނުމަށް ނިންމާފައިވަނީ ކައުންސިލުން ބޭއްވި ބައްދަލުވުމެއްގައި ފާސްކޮށްގެންނެވެ.
ނަމަވެސް، ހުރާ ކައުންސިލުން ބާއްވާ ހާފިޒުން ތަމްރީނުކުރުމުގެ ޕްރޮގްރާމާ ގުޅޭ އިތުރު މަޢުލޫމާތެއް މިވަގުތާ ހަމައަށް ހާމަކޮށްފައެއް ނުވެއެވެ.
ކޮމެންޓު ފޮނުވާ