މޯލްޑިވްސް ޑިވްލޮޕްމަންޓް ބޭންކް (ޑީބީއެމް) އިން އިންވެސްޓްމަންޓްތައް ފެށުމުގެ މަސައްކަތް ތިން މަރުހަލާއެއްގައި ކުރަމުންދާ ކަމަށާއި، އެ މަސައްކަތްތައް މި އަހަރުގެ ފުރަތަމަ ކުއާޓަރުގައި ނިމޭނެ ކަމަށް އިކޮނޮމިކް މިނިސްޓްރީން ބުނެފި އެވެ.
ރާއްޖޭގައި ފުރަތަމަ ތަރައްގީ ކުރި އިންވެސްޓްމަންޓް ބޭންކް، ޑީބީއެމްގެ މަސައްކަތުގެ އަޕްޑޭޓެއް ދެއްވަމުން މިނިސްޓަރު މުހައްމަދު ސައީދު ވިދާޅުވީ މިހާރު ކުރަމުން ގެންދަނީ އިންސްޓިޓިއުޝަނަލް ސެޓަޕްގެ މަސައްކަތްތަކާއި ބިޒްނަސް މޮޑެލް އެކުލަވައިލުމުގެ އިތުރުން ޑިވެލޮޕްމެންޓް ބޭންކުގެ ސިޔާސަތުތައް އެކުލަވައިލުމުގެ މަސައްކަތްތަކެވެ. އެ މަސައްކަތްތައް މި އަހަރުގެ ފުރަތަމަ ކުއާޓަރުގައި ނިމޭނެ އެވެ.
ރާއްޖޭގެ ފުރަތަމަ ޑިވެލޮޕްމަންޓް ބޭންކް އިފްތިތާހުކޮށްދެއްވީ މިދިޔަ އަހަރުގެ ނޮވެމްބަރު 16 ވަނަ ދުވަހު އެވެ. ބޭންކް ހިންގަން ފަށަން ސެޓަޕްހަދައި އަމަލީ ގޮތުން ފައިނޭންސް ދޫކުރަން ފެށުމުގެ މަސައްކަތް ކުރަނީ ރާއްޖޭގެ ފުރަތަމަ މަރުކަޒީ ބޭންކް ހިންގި އުމަރުޝޮޕިން އާކޭޑް ހުރި އިމާރާތުގެ ތިރީގައި އެވެ.
ޑިވެލޮޕްމަންޓް ބޭންކުން ސަމާލުކަން ދޭނީ ހަކަތައާއި ކާބޯތަކެތީގެ ޔަގީންކަން އަދި އަގުތައް ހިފެހެއްޓުމާއި، ވަޒަންވެރިކަމާއި ބޯހިޔާވަހިކަމާއި، ތިމާވެށި ހިމާޔަތްކުރުމާއި، ޓޫރިޒަމް އަދި ވައިގެ ދަތުރުފަތުރުގެ ޚިދުމަތްތަކާއި، ކަނޑުގެ މަންފާއާއި ކަނޑާ ގުޅިފައިވާ އިގްތިޞާދީ ހަރަކާތްތަކާއި، އިގްތިޞާދީ ތަރައްގީގެ ޕްލޭނުގައި ހިމެނޭ ސިނާއަތްތަކަށް ފައިނޭންސް ހޯދުމަށެވެ.
މޯލްޑިވްސް ޑިވެލޮޕްމަންޓް ބޭންކް (ޑީބީއެމް) ގެ ސީއީއޯ ނޮއެލް ގްރެގާ ޕެޓާސަން ޖޯންސް ވިދާޅުވެފައިވާ ގޮތުގައި މި ބޭންކަކީ ރާއްޖެއަކީ ތަރައްގީވެފައިވާ ގައުމަކަށް ހެދުމަށް އެންމެ މުހިންމު ދައުރެއް އަދާކުރާނެ ފަރާތް ކަމަށާއި ބޭންކް ކުރިމަގުގައި ވެގެންދާނީ ރާއްޖޭގެ ތަރައްގީގެ މުހިންމު ބައިވެރިޔާގެ ގޮތުގައި ކަމަށެވެ. ރައީސް ޑރ. މުހައްމަދު މުއިއްޒުގެ ތަސައްވުރު ކަމަށްވާ ރާއްޖެ 2040 ވަނަ އަހަރު އެންމެ ތަރައްގީވެފައިވާ ގައުމަކަށް ހެދުމުގެ ތަސައްވުރަށް ދާން މި ބޭންކުން މުހިންމު ރޯލެއް ކުޅޭނެކަން އޭނާ ފާހަގަ ކުރެއްވި އެވެ.
"ރާއްޖެ އަށް މާލީ ދަތިތަކެއް އެބަހުރި. އިމާރާތްކުރުމުގެ ދާއިރާގައި އިންވެސްޓްމެންޓް މަދުވުންފަދަ ދަތިތަކެއް ވެސް އެބަހުރި. ރާއްޖޭގެ ދަރަނި މަތިވުމުގެ މައްސަލަ ވެސް އެބައޮތް. ޑިވެލޮޕްމެންޓް ބޭންކާއެކު މާލީ ހާލަތު ރަނގަޅުކޮށް، މަޝްރޫއުތަކަށް އިންވެސްޓަރުން ހޯދައިދީ އިމާރާތްކުރުމުގެ ދާއިރާ އަށް ދިރުން ގެނެސްދޭނެ،" ބޭންކިން އާއި ފައިނޭންސިން ދާއިރާގެ ތަޖުރިބާކާރު ވިދާޅުވި އެވެ.
އޭނާ ވިދާޅުވީ ޑީބީއެމް ވެގެންދާނީ ބޮޑެތި އިންވެސްޓްމަންޓްތަކަށް އެހީތެރިކަންދޭ ބޭންކެއްގެ އިތުރުން ރާއްޖޭގެ މެދުފަންތީގެ ވިޔަފާރިތަކަށްވެސް ދިރުން ގެންނަ ފަރާތަކަށް ކަމަށެވެ. މިކަމުގައި ބޭންކް މަސައްކަތް ކުރާނީ އިންޓަނޭޝަނަލް ޕާޓްނަރުންނާއެކުގައިކަން އޭނާ ފާހަގަ ކުރެއްވި އެވެ.
ރާއްޖޭގެ ބޮޑެތި އިންވެސްޓްމަންޓްތަކަށް ފައިނޭންސް ހޯދަން އިންގިލާބީ ބަދަލެއް ގެނެސް ކުރިއަރުވަން ޑިވެލޮޕްމަންޓް ބޭންކެއް ހެދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން މި ބޭންކް އުފައްދާފައިވަނީ މިދާއިރާއިން ދުނިޔޭގެ ފެންވަރުގައި ފާހަގަކޮށްލެވޭ ފަރާތްތަކާއެކުގައެވެ. އެގޮތުން ޑިވެލޮޕްމަންޓް ބޭންކުގެ ސީއީއޯގެ މަގާމަށް އައްޔަންކުރީ އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސް އެވެ. ޗެއާޕާސަންގެ މަގާމަށް އައްޔަންކުރީ ސިންގަޕޫރުގެ ރައްޔިތެއް ކަމަށްވާ އަރުނީ ގުނެތިލަކަ އެވެ.
މި ދެބޭފުޅުންނަކީ ވެސް ދުނިޔޭގެ މާލީ އިދާރާތަކުގެ އިސް މަގާމުތަކެއް ފުރުއްވާފައިވާ ބޭފުޅުންނެވެ. މީގެ އިތުރުން ބޯޑުގައި ހިމެނިވަޑައިގަންނަވަނީ އަހްމަދު އަލީ – މއ. ވޭސައިޑް 805 ފްލެޓް އާއި ސިންގަޕޫރުގެ ސައީދު އަބްދުއްނާސިރު ބިން ސައީދު ހަސަން އަލް ޖުނެއިދު އާއި އިނގިރޭސިވިލާތުގެ ރޮބަޓް ޑުނިއެލް ކާންޓް އެވެ.
