ހުޅުމާލޭގައި އެޕާޓްމެންޓް ގަތުމުގެ ނަމުގައި އޮޅުވާލައިގެން ފައިސާ ނެގުމުގެ މައްސަލަތައް އިތުރުވެފައިވަނީ، އެއްމެދު އިމާރާތުގެ ޤާނޫނުގެ ދަށުން ސްޓްރާޓާ ސްކީމްގައި އެފަދަ ތަންތަން ރަޖިސްޓްރީ ކުރެވިފައި ނެތުމުގެ ސަބަބުން ކަމުގައި ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެއެވެ.
ގައުމީ ސަލާމަތާ ބެހޭ ކޮމިޓީގެ މެންބަރެއް ކަމުގައިވާ ނާޒިމް ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، ހުޅުމާލޭގައި ހުރި އިމާރާތްތައް ސްޓްރާޓާ ސްކީމްގެ ދަށުން ރަޖިސްޓްރީ ކުރުމަށް ހައުސިންގ މިނިސްޓްރީން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް އަންގާފައިވީ ނަމަވެސް، އެޗްޑީސީން އެކަން ކޮށްފައި ނުވާ ކަމަށެވެ. މި މައްސަލައިގެ ސަބަބުން ގައުމީ ސަލާމަތަށް ނުރައްކާވެދާނެ ކަމަށް ފާހަގަކުރައްވައި، 241 ކޮމިޓީން މިހާރު ވަނީ މި މައްސަލަ ހައްލުކުރުމަށް މަސައްކަތް ފަށާފައެވެ.
ނާޒިމް އިތުރަށް ފާހަގަކުރެއްވި ގޮތުގައި، މި ހާލަތުގައި ހުޅުމާލޭގެ އެޕާޓްމަންޓްތަކުގެ އަސްލު ވެރިފަރާތްތަކާއި ނެއިބާއިންނަކީ ކޮބައިކަން ދެނެގަތުމަށް ދަތިތަކެއް ކުރިމަތިވެފައިވާ ކަމަށާއި، މިއީ އެކި ބާވަތުގެ ސްކޭމްތަކަށް މަގުފަހިވާ ކަމެއް ކަމުގައި ވިދާޅުވިއެވެ.
އެއްމެދު އިމާރާތްތައް ހިންގައި ބެލެހެއްޓުމަށްޓަކައި "ސްޓްރާޓާ ޕޯޓަލް" ގެ ނަމުގައި ވަކި ޕޯޓަލްއެއް 2024 ވަނަ އަހަރުގެ ޖެނުއަރީ 24 ވަނަ ދުވަހު ވަނީ ތަޢާރަފުކޮށްފައެވެ. ސްޓްރާޓާ ސްކީމަކީ އެއް އިމާރާތެއް ނުވަތަ އެކި އިމާރާތްތަކުގައި ހުންނަ ވަކިވަކި ޔުނިޓްތައް އަމިއްލަ ފަރުދުންނަށް މިލްކުކުރެވޭ ގޮތަށް ހަމަޖެހިފައިވާ ނިޒާމެކެވެ.
މި ނިޒާމުގެ ދަށުން، އިމާރާތުގެ އާންމު ސަރަހައްދުތަކުގެ މިލްކުވެރިކަން ހުރިހާ ޔުނިޓް ވެރިންގެ މެދުގައި ހިއްސާވެ، އެތަންތަން ބެލެހެއްޓުމުގެ ޒިންމާ އެފަރާތްތަކުން ޙިއްސާކުރާ ގޮތަށް ހަމަޖެހިފައިވެއެވެ.
