ރިސޯޓުތަކުން ލިބޭ އާމްދަނީ ދިވެހި ރުފިޔާއަށް މާރުކުރަން ލާޒިމުކުރާ ގަވާއިދުގެ ދަށުން، މިދިޔަ އޮކްޓޯބަރު ރިސޯޓުތަކަށް ލިބުނު އާމްދަނީން ގާތްގަނޑަކަށް 40 މިލިއަން ޑޮލަރު މާރުކުރެވޭނެ ކަމަށް އެމްއެމްއޭއިން ލަފާކޮށްފިއެވެ.
މި މުއްދަތުގެ ތެރޭގައި ޖުމްލަ 138 ރިސޯޓަކުން ވަނީ ސޭލްސް ރިޕޯޓު ހުށަހަޅާފައެވެ. ނަމަވެސް އަދިވެސް 37 ރިސޯޓަކުން މި ރިޕޯޓު ހުށަނާޅާ ކަމަށް އެމްއެމްއޭއިން ފާހަގަކުރެއެވެ. ހުށަހެޅިފައިވާ ސޭލްސް ރިޕޯޓުތަކަށް ބިނާކޮށް، ބޭރު ފައިސާ މާރުކުރުމުގެ ގަވާއިދުގެ ދަށުން 30 އާއި 40 މިލިއަން ޑޮލަރާ ދެމެދުގެ އަދަދެއް ބޭންކުތަކަށް މާރުކުރެވޭނެ ކަމަށް ބެލެވެއެވެ. މިއީ ގާތްގަނޑަކަށް 617 މިލިއަން ރުފިޔާއެވެ.
މިދިޔަ އަހަރުގެ ޑިސެމްބަރު 14 ވަނަ ދުވަހު ވަނީ ބޭރު ފައިސާއާ ބެހޭ ބިލް ތަސްދީގުކޮށް އަމަލުކުރަން ފަށާފައެވެ. މި އައު ގާނޫނުގެ ދަށުން، ކުރިން އަމަލުކުރަން ނިންމާފައިވާ ގަވާއިދުގައި ބަޔާންކޮށްފައިވާ ޓޫރިސްޓަކަށް 500 ޑޮލަރު ދެއްކުމުގެ ބަދަލުގައި، އާމްދަނީގެ 20 ޕަސެންޓް މާރުކުރުމުގެ އިހުތިޔާރު ރިސޯޓުތަކަށް ލިބިގެންދާނެއެވެ.
