ދިވެހިރާއްޖޭގެ އެކި ސަރަހައްދުތަކުގައި މަޑީގެ ބާވަތްތަކަށް ކާންދިނުމުގެ މައްސަލަ އިތުރުވަމުންދާތީ، ތިމާވެށި ހިމާޔަތްކުރާ އިދާރާ އީޕީއޭއިން އެކަމާމެދު ކަންބޮޑުވުން ފާޅުކޮށްފިއެވެ. އެ އިދާރާއިން ނެރުނު ނޫސްބަޔާނެއްގައި ފާހަގަކޮށްފައިވާ ގޮތުގައި، ރާއްޖޭގައި އުޅޭ ހުރިހާ މަޑީގެ ބާވަތްތަކަކީ ގުދުރަތީގޮތުން ހިމާޔަތްކުރެވިފައިވާ ދިރުންތަކެކެވެ. އަދި އެ ދިރުންތަކަށް ގެއްލުން ލިބިދާނެ އެއްވެސް ކަމެއް ކުރުމަކީ މަނާކަމެކެވެ.
ދިރާސާތަކުން ދައްކާގޮތުގައި މަޑީގެ ބާވަތްތަކަށް ކާންދިނުމަކީ އެ ތަކެތީގެ ގުދުރަތީ އާދަތަކަށް ނޭދެވޭ އަސަރުކުރާނެ ކަމެކެވެ. މީގެ އިތުރުން، މަޑި ބެލުމާއި އެތަކެއްޗާއެކު ފީނުމަކީ ރައްޔިތުންނާއި ފަތުރުވެރިންގެ މެދުގައި މަޤްބޫލު ހަރަކާތެއް ނަމަވެސް، މިފަދަ ކަންކަމުގެ ސަބަބުން އިންސާނުންނަށް އެކި ބާވަތުގެ އަނިޔާތަކާއި، ބައެއް ފަހަރު ފުރާނައަށް ނުރައްކާވާފަދަ ހިތާމަވެރި ހާދިސާތައް ދިމާވެއެވެ.
އީޕީއޭއިން ހާމަކުރިގޮތުގައި މިފަދަ ހާދިސާތައް ހިނގަނީ މައިގަނޑު ގޮތެއްގައި ގިނަ އަދަދެއްގެ މިޔަރު އެއްވެ، މަޑި ނުވަތަ މިޔަރަށް ކާންއެޅުމުން މިޔަރު ދަތްއަޅާތީއެވެ. އަދި މަޑީގެ ކަށި ހެރިގެންވެސް ހާދިސާތައް ހިނގުމަށް މަގުފަހިވެއެވެ. މިފަދަ ހާދިސާތައް ގިނަވުމަކީ ފަތުރުވެރިކަމަށްވެސް އަސަރުކުރާނެ ކަމެކެވެ.
ރާއްޖެއަށް ޒިޔާރަތްކުރާ ގިނަ ފަތުރުވެރިން މަޑިއާއި މިޔަރަށް ކާންދިނުން ހުއްޓުވުމަށް އެދި އީޕީއޭއަށް ޝަކުވާ ހުށަހަޅައި، ހިތްހަމަނުޖެހުން ފާޅުކުރަމުންދެއެވެ. އެހެންކަމުން، މަޑީގެ ބާވަތްތައް ބެލުމަށް ކުރިއަށްގެންދެވޭ އެންމެހައި ހަރަކާތްތަކަކީ ގަވާއިދުތަކާއި އުސޫލުތަކާ އެއްގޮތަށް ހިންގޭ، އިންސާނުންނަށް ރައްކާތެރި އަދި ތިމާވެއްޓާ ރައްޓެހި ހަރަކާތްތަކަކަށް ހެދުމަށް އީޕީއޭއިން ގޮވާލާފައިވެއެވެ. އަދި ގަވާއިދާ ޚިލާފުވާ ފަރާތްތަކާމެދު ގުދުރަތީގޮތުން ހިމާޔަތްކުރެވިފައިވާ ދިރުންތަކާބެހޭ ގަވާއިދުގެ ދަށުން ފިޔަވަޅު އަޅާނެކަން އެ އިދާރާއިން ހާމަކޮށްފައިވެއެވެ.
