ކުރީގެ ރައީސް އިބްރާހިމް މުހައްމަދު ސޯލިހު މިވަގުތު ކުރައްވަމުން ގެންދަވާ ލަންކާގެ ދަތުރުފުޅުގައި، އެގައުމުގެ ކުރީގެ ރައީސުންނާ ވަނީ ބައްދަލުކުރައްވާފައެވެ. މީގެ ތެރޭގައި މަހިންދަ ރާޖަޕަކްސަ އަދި ގޯޓާބޭ ރާޖަޕަކްސަ ހިމެނެއެވެ. މި ބައްދަލުކުރެއްވުމުގައި ދިވެހިރާއްޖެ އާއި ސްރީލަންކާއާ ދެމެދު އޮތް ގާތް ގުޅުމާއި، ދެ ގައުމަށް މި ސަރަހައްދުން ލިބެންހުރި ފުރުސަތުތަކާއި ކުރިމަތިވެފައިވާ ގޮންޖެހުންތަކާ ބެހޭގޮތުން މަޝްވަރާކުރެވުނު ކަމަށް ސޯލިހު ވަނީ އެކްސްގައި ހާމަކުރައްވާފައެވެ.
އަދި މި ދަތުރުފުޅުގައި އިއްޔެ ސޯލިހު ވަނީ ލަންކާގެ އަނެއް ކުރީގެ ރައީސް ރަނިލް ވިކްރަމްސިންހައާވެސް ބައްދަލުކުރައްވާފައެވެ. މި ބައްދަލުކުރެއްވުމުގައި ސިޔާސީ މަސްރަހާ ގުޅޭ މަޝްވަރާތަކެއް ކުރެވުނެވެ. ނަމަވެސް، މި ދަތުރުފުޅާ ގުޅޭ އިތުރު މައުލޫމާތެއް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިހާތަނަށް ހާމަކުރައްވާފައެއް ނުވެއެވެ.
