ހުޅުމާލެ ފޭސް އެކެއްގައި އާއި ފޭސް ދޭއްގައި ވެހިކަލް ދޮވެ ސާފް ކުރުމުގެ ވިޔަފާރީގައި އުޅުނު އަށް ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ބުނީ ހުޅުމާލޭގެ އެކި ސަރަހައްދުތަކުގައި ގަވާއިދާ ހިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދާ ބިދޭސީންނަށް އަމާޒުކޮށް އިއްޔެ އޮޕަރޭޝަނެއް ކުރިއަށް ގެންގޮސްފައިވާ ކަމަށެވެ. އަދި ސައްހަ ވިސާއެއް ނެތް އަށް ބިދޭސީން އިމިގްރޭޝަންގެ ބެލުމުގެ ދަށަށް ގެނައި ކަމަށް އިމިގްރޭޝަނުން ބުނެއެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން ގިނަ މަސައްކަތްތަކެއް ދަނީ ކުރަމުންނެވެ. މިފަދަ އޮޕަރޭޝަންތައް ކުރިއަށް އޮތް ތަނުގައި ވެސް ހިންގަމުން ގެންދާނެ ކަމުގެ ޔަގީންކަން އިމިގްރޭޝަނުން ދެއެވެ.
މި ސަރުކާރުން ވެރިކަމާ ހަވާލުވި ފަހުން ރާއްޖޭގައި ގަވާއިދާ ހިލާފަށް އުޅެމުން އަންނަ ބިދޭސީން ހޯދައި، އެމީހުންނާ މެދު ފިޔަވަޅު އަޅަމުންދާތީ ސަރުކާރަށް އެތައް ތައުރީފެއް ލިބެއެވެ. މި މަސައްކަތުގެ ދަށުން މިހާތަނަށް އައިއިރު، 5،000 އަށް ވުރެ ގިނަ ބިދޭސީން ވަނީ ޑީޕޯޓްކޮށްލައިފައެވެ.
