ސަރުކާރުގެ ވަކިވަކި އިދާރާތަކުން ހިންގާ އަމިއްލަ ރިޓަޔަމެންޓް ސްކީމްގެ ތެރެއިން ވަޒީފާ އިން އަލަށް ރިޓަޔާވާ މުވައްޒަފުންނަށް މަހުން މަހަށް ދޭން ކަނޑައަޅާފައިވާ އެލަވަންސްތައް ނުދޭން ނިންމި ނިންމުން ސަރުކާރުން ބާތިލްކޮށްފިއެވެ.
ސަރުކާރުން ކުރިން ނިންމާފައި ވަނީ އަންނަ މަހުގެ 1 އިން ފެށިގެން ވަޒީފާ އިން އަލަށް ރިޓަޔާކުރާ މުވައްޒަފުންނަށް މަހުން މަހަށް ދޭ ޕެންޝަން ހުއްޓާލުމަށެވެ.
ސަރުކާރުގެ ވަޒީފާއިން އަލަށް ރިޓަޔާ މުވައްޒަފުންނަށް މަހުން މަހަށް ދޭ ޕެންޝަން ޖެނުއަރީން ފެށިގެން ހުއްޓާލާނެކަން ސަރުކާރުން އިއުލާނުކުރީ މިދިޔަ ހަފްތާގައި ފިނޭންސް މިނިސްޓަރު މޫސާ ޒަމީރު ސޮއިކުރައްވައި ނެރުއްވި ސިޓީއަކުންނެވެ.
ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ، އެ ނިންމުން ބަދަލުކުރީ މުވައްޒަފުންގެ ކަންބޮޑުވުންތަކެއް ހުރުމާ އެކު، ކެބިނެޓްގެ އިއްޔެގެ ބައްދަލުވުމަށް ރައީސް ޑރ. މުހައްމަދު މުއިއްޒު އެ މައްސަލަ ހުށަހަޅުއްވައި، ފުޅާ ދާއިރާއެއްގައި މަޝްވަރާ ކުރެއްވުމަށް ފަހު ކަމަށެވެ.
ސަރުކާރުގެ 13 އިދާރާއަކަށް ދަނީ ޑަބަލް ޕެންޝަން ދެމުންނެވެ. އޭގެ ތެރޭގައި ފުލުހުންނާއި ސިފައިންނާއި ރައީސް އޮފީހާއި ޖުޑިޝަލް ސާވިސް ކޮމިޝަނާއި ޕްރޮސެކިއުޓާ ޖެނެރަލް އޮފީހާއި ރައްޔިތުންގެ މަޖިލިހުގެ އިދާރާ އާއި ސިިވިލް ސާވިސް ކޮމިޝަން ފަދަ އިދާރާތައް ހިމެނެއެވެ.
އޮޑިޓަ ޖެނެރަލް 2015 ގައި ނެރުއްވި ހާއްސަ އޮޑިޓް ރިޕޯޓެއްގައި ވަނީ ޑަބަލް ޕެންޝަން ދޭ ނިޒާމަކީ ދެމެހެއްޓެނިވި ނިޒާމެއް ނޫން ކަމަށާއި އެއީ އިންސާފުވެރިގޮތެއް ނޫން ކަމަށް ބުނެފައެވެ. ޑަބަލް ޕެންޝަން ނިޒާމު އުވާލުމަށް ވޯލްޑް ބޭންކާއި އައިއެމްއެފް އިން ވެސް ސަރުކާރަށް މީގެ ކުރިން ލަފާ ދިނެވެ.
