ރާއްޖެ ކައިރީގައި އުފެދުނު ދެ ކޮޅިގަނޑުގެ ސަބަބުން ބުދަ ދުވަހުން ފެށިގެން ވައިގަދަވެ، ކަނޑުތައް ގަދަވާނެ ކަމަށް މެޓް އޮފީހުން ލަފާކޮށްފިއެވެ.
މެޓް އޮފީހުން ނެރުނު ބަޔާނެއްގައި ބުނީ ރާއްޖޭގެ އިރުން ބޭ އޮފް ބެންގަލްގައި އުފެދިފައިވާ ކޮޅިގަނޑު ކުރިއަށް އޮތް 24 ގަޑިއިރުގެ ތެރޭގައި އިތުރަށް ބާރުގަދަވެ، ބާރުގަދަ ކޮޅިގަނޑަކަށް ބަދަލުވާނެ ކަމަށް ބެލެވޭ ކަމަށެވެ. އަދި އެ ކޮޅިގަނޑު ދަތުރުކުރަމުން ދާނެ ކަމަށް ބެލެވެނީ ހުޅަނގު އުތުރަށް، ސްރީ ލަންކާގެ އައްސޭރިފަށާއި އިންޑިއާގެ ޓެމިލްނާޑުއާ ދިމާލަށް ކަމަށް ވެސް ބަޔާނުގައިވެއެވެ.
އެ ކޮޅިގަނޑުގެ އިތުރުން ރާއްޖެއާ ދުރުން، ރާއްޖޭގެ އިރުދެކުނުގައި ކޮޅިގަނޑެއް އުފެދިފައިވާ ކަމަށް މެޓުގެ ބަޔާނުގައިވެއެވެ.
މި ދެކޮޅިގަނޑުގެ ސަބަބުން އަންނަ ބުދަ ދުވަހުން ފެށިގެން ކުރިއަށް އޮތް ފަސް ދުވަހު ރާއްޖޭގެ ސަރަހައްދުގައި ވައިބާރުވާނެ ކަމަށް ލަފާކުރެވޭ ކަމަށް މެޓް އޮފީހުން ބުންޏެވެ.
މެޓް އޮފީހުން ލަފާކުރާ ގޮތުގައި، އާންމު ގޮތެއްގައި ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި އަދި އުތުރާއި މެދު ރާއްޖެ ތެރޭގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެއެވެ. އެހެންވެ ހުރިހާ ހިސާބެއްގެ ކަނޑުތައް ގަދަވާނެ ކަމަށް ލަފާކޮށްފައިވެއެވެ.
މެޓް އޮފީހުން ވަނީ މި ފަސް ދުވަހު ކަނޑު ކަނޑުދަތުރުކުރުމުގައި ހާއްސަ ސަމާލުކަމެއް ދިނުމަށާއި ދަތުރު ފެށުމުގެ ކުރިން ރައްކާތެރިކަން ކަށަވަރުކުރަން އިލްތިމާސްކޮށްފައެވެ.
