2028 ވަނަ އަހަރު ބޭއްވޭ ރިޔާސީ އިންތިޚާބުގެ ޓިކެޓް ހޯއްދެވުމަށް އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެކަން އެމްޑީޕީގެ ޗެއާޕާސަން ފައްޔާޒް އިސްމާއީލް މިއަދު ރަސްމީކޮށް އިއުލާނު ކުރައްވައިފިއެވެ.
މިހާރު އިދިކޮޅު މައި ޕާޓީ ކަމުގައިވާ އެމްޑީޕީ ހިންގެވުމުގައި އިސްކޮށް ހުންނެވި ފައްޔާޒް މި ކަން އިއުލާނު ކުރެއްވީ އެމްޑީޕީގެ ގައުމީ މަޖިލީހުގެ މެންބަރުން ތިއްބަވާ ވަޓްސްއެޕް ގްރޫޕްގައެވެ. ރިޔާސީ ޕްރައިމަރީގައި ވާދަ ކުރައްވާނެކަން އިއުލާން ކުރެއްވުމަށްފަހު އޭނާ ވަނީ ގައުމީ މަޖިލީހުގެ މެންބަރުންނާއި ޕާޓީގެ އާންމު މެންބަރުންގެ ފުރިހަމަ ތާއީދަށް އެދިވަޑައިގެންފައެވެ. ފައްޔާޒުވަނީ ރައީސް ސޯލިހްގެ ސަރުކާރުގައި އިކޮނޮމިކް މިނިސްޓަރުކަން ކުރައްވާފައެވެ.
ރިޔާސީ ރޭހަށް ނިކުތުމަށް ފައްޔާޒުގެ އިތުރުން އެ ޕާޓީގެ އިސް ލީޑަރުން ވެސް މަސައްކަތް ކުރައްވައެވެ. އޭގެ ތެރޭގައި ކުރީގެ ފޮރިން މިނިސްޓަރު އަބްދުﷲ ޝާހިދު އެންމެ އިސްކޮށް މަސައްކަތް ކުރައްވާއިރު، ކުރީގެ ނައިބު ރައީސް ފައިސަލް ނަސީމާއި މާލޭ ސިޓީގެ މޭޔަރު އާދަމް އާޒިމް ވެސް އެމްޑީޕީގެ ރިޔާސީ ޓިކެޓްގެ ޝައުގުވެރިކަމުގައި މަސައްކަތް ކުރައްވާކަމަށް އެނގިފައި ވެއެވެ.
އެންމެ ފަހުން އޮތް ދެ ރިޔާސީ އިންތިޚާބު (2018 އަދި 2023) ގައި އެމްޑީޕީގެ ޓިކެޓްގައި ވާދަކުރެއްވީ ކުރީގެ ރައީސް އިބްރާހިމް މުޙައްމަދު ޞާލިޙެވެ. ނަމަވެސް އެންމެ ފަހުން އޮތް އިންތިޚާބުގައި އެމަނިކުފާނަށް ނާކާމިޔާބުވެ، ރިޔާސީ ދެވަނަ ދައުރެއްގެ ފުރުޞަތު ގެއްލިވަޑައިގެންނެވިއެވެ.
ކުރިއަށް އޮތް އިންތިޚާބުގައި ވާދަކުރެއްވުމާ މެދު ސުވާލުކުރެވުނު އިރު، ރައީސް ޞާލިޙް ވިދާޅުވެފައިވަނީ މިވަގުތު އެމަނިކުފާނުގެ ނިންމެވުން ހާމަކުރެއްވުމުން ޕާޓީއަށް އަސަރުކުރާނެ ކަމަށާއި، އެންމެ ރަނގަޅު ވަގުތުގައި އެކަން އިއުލާނު ކުރައްވާނެ ކަމަށެވެ. ގިނަ ބަޔަކު ދެކެނީ ރައީސް ޞާލިޙް އަދިވެސް ފަހަތަށް ޖެހިވަޑައިނުގަންނަވާނެ ކަމަށާއި، އެންމެ ފަހު ވަގުތު ނިކުމެވަޑައިގެން ރިޔާސީ ޓިކެޓް ހޯއްދަވާނީ އެމަނިކުފާނު ކަމަށެވެ. އެކަމަށް އެމަނިކުފާނު މިހާރުއްސުރެ މަސައްކަތް ކުރައްވަމުން ގެންދަވާ ކަމަށް ބެލެވެއެވެ.
