ލަންޑަނުގައި މިހާރު ކުރިއަށްދާ ވޯލްޑް ޓްރެވަލް މާކެޓު ފެއަރގައި ފަތުރުވެރިކަމާބެހޭ ވަޒީރު އިބްރާހިމް ފައިސަލް މަޓާޓޯގެ "މޯލްޑިވްސް ފައިންޑަރ 2025″ މަޖައްލާ ރަސްމީކޮށް އިފްތިތާޙުކޮށްދެއްވައިފިއެވެ. މި މަޖައްލާއަކީ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އިން އަހަރަކު އެއްފަހަރު ނެރޭ މަޖައްލާއެކެވެ.
މަޓާޓޯއިން ހާމަކުރި ގޮތުގައި މި މަޖައްލާ ނެރެފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ފަތުރުވެރިކަމާބެހޭ މިނިސްޓްރީގެ އެންޑޯސްމަންޓާ އެކުގައެވެ. މި މަޖައްލާގައި ދިވެހިރާއްޖޭގެ ރީތި މަންޒަރުތަކާއި، ރާއްޖެއިން ލިބެންހުރި ބައިނަލްއަޤްވާމީ ފެންވަރުގެ ކެއިންބުއިމާއި، ފޮޓޯގްރަފީގެ ޚިދުމަތްތަކާއި، ދިވެހި ސަގާފަތާ ގުޅޭ މައުލޫމާތު ހިމަނާފައިވެއެވެ. އަދި މީގެ އިތުރުން ފަތުރުވެރިކަމުގެ ދާއިރާގައި ފާހަގަކޮށްލެވޭ ޝަޚްޞިއްޔަތުތަކާއި ހުނަރުވެރިންނާއި އެކި ވިޔަފާރިތަކުގެ ލިޔުންތަކުގެ އިތުރުން ދަތުރުވެރިންނަށް ބޭނުންވާ މުހިންމު މައުލޫމާތުވެސް މި މަޖައްލާގައި ހިމަނާފައިވެއެވެ.
މަޖައްލާ އިފްތިތާޙުކުރުމަށް ބޭއްވި ރަސްމިއްޔާތުގައި މަޓާޓޯގެ ސީއީއޯ އާމިނަތު ސޫޒަން ވިދާޅުވި ގޮތުގައި މި މަޖައްލާ ނެރުމުގެ މައިގަނޑު މަޤްޞަދަކީ ދިވެހިރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއެރުވުމާއި، ބައިނަލްއަޤްވާމީ ފެންވަރުގައި ރާއްޖޭގެ ފަތުރުވެރިކަން އިޝްތިހާރުކޮށް، އިތުރު ފަތުރުވެރިން ރާއްޖެއަށް ޒިޔާރަތްކުރުމަށް ހިތްވަރު ދިނުމެވެ.
