ސަރުކާރުގެ މިއަންނަ އަހަރުގެ ބަޖެޓާ މެދު އިދިކޮޅު އެމްޑީޕީގެ ޕާލިމެންޓަރީ ގްރޫޕުން މިއަދު ފާޅުކުރި ކަންބޮޑުވުންތަކުގައި، ބަޖެޓު ފާސްކުރުމުގެ މަސައްކަތް ވަރަށް އަވަސް އަރުވާލައިގެން ކުރިއަށްދާކަމަށް ބުނެފިއެވެ.

މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވިގޮތުގައި، މިހާތަނަށް ވެސް ބަޖެޓުގެ ތަފްސީލު ހިމެނޭ ފޮތް ނުލިބޭކަމާއި، އެ ފޮތް ލިބުމުން ނޫނީ ބަޖެޓު ރަނގަޅަށް ދިރާސާނުކުރެވޭނެ ކަމަށް ވިދާޅުވިއެވެ. މި ވީހާ ދުވަހު ވެސް ބަޖެޓު ފޮތް ނުލިބި ބަޖެޓު ހުށަހެޅިގެން ނުދާކަން އޭނާ ފާހަގަކުރެއްވިއެވެ.

މި އަހަރުގެ ބަޖެޓު ހޭދަކުރެވުނު ގޮތުގެ ތަފްސީލާއި، އެއްވެސް މަޝްރޫއެއް ކުރިއަށް ދިޔަގޮތާއި، ސަރުކާރުން ފައިސާ ހަރަދުކުރި ގޮތެއް އެނގޭނީ ވެސް ބަޖެޓު ފޮތް ލިބުމުން ކަމަށް އަބްދުލްޣަފޫރު ވިދާޅުވިއެވެ. އަދި ރައްޔިތުންގެ އަތުން ޓެކްސްގެ ގޮތުގައި ފައިސާ ނަގަމުންދިޔަ ނަމަވެސް، ދައުލަތުގެ ރިކަރަންޓް ހަރަދު އަތްނުޖެހޭ ހިސާބަށް އިތުރުވަމުންދާކަން ފާހަގަކުރެއްވިއެވެ.

ކުރިއަށް އޮތް 14 ދުވަހުގެ ތެރޭގައި ބަޖެޓުގެ މަސައްކަތްތައް ނިންމޭނެކަމާމެދު އަބްދުލްޣަފޫރު ސުވާލު އުފައްދަވާފައިވާއިރު، ބަޖެޓުގެ މަސައްކަތްތައް ކުރިއަށް ގެންދަނީ 'ކުރުގަ އަޅުވާލައިގެން' އަވަސް އަރުވާލައިގެން ކަމަށް ވިދާޅުވިއެވެ.

މީގެއިތުރުން، ކައުންސިލްތަކަށް ދޭންޖެހޭ ބްލޮކް ގްރާންޓް ބަޖެޓުގައި ކަނޑައަޅާފައިވަނީ ގާނޫނާ ހިލާފަށްކަމާއި، ކައުންސިލްތަކުގެ ބަޖެޓުން 30 ޕަސެންޓު އުނިކޮށްފައިވާކަން ވެސް އޭނާ ފާހަގަކުރެއްވިއެވެ.