ކްރިމިނަލް ކޯޓުން މިއަދު މަސްތުވާތަކެތީގެ ވިޔަފާރިކުރުމުގެ ބޮޑު މައްސަލައެއްގައި މާލޭ ހ. ބްލޫބާޑުގޭ ހުސައިން އަބްދުﷲގެ މައްޗަށް އުމުރަށް ޖަލަށްލުމާއެކު 400،000 ރުފިޔާއިން ޖޫރިމަނާކުރުމަށް ހުކުމްކޮށްފިއެވެ.
މި މައްސަލައިގައި ދައުލަތުން ހުށަހެޅި ދަޢުވާއަކީ ޑައިމޯފިން ޓްރެފިކްކުރުމުގެ ކުށުގެ ދަޢުވާއެވެ. މިދިޔަ އަހަރުގެ ފެބްރުއަރީ މަހު ފުލުހުންނަށް ލިބުނު މަޢުލޫމާތަކާ ގުޅިގެން، އަބްދުﷲ އެހެން ބަޔަކާއެކު މަސްތުވާތަކެތީގެ ވިޔަފާރިކުރުމަށް ކުއްޔަށް ހިފާފައިވާ ގ. ކޯޒީގޭގެ ދެވަނަ ފަންގިފިލާ ބަލައި ފާސްކުރިއެވެ. އެތަނުން 50 ގްރާމް، 24.8 ގްރާމް އަދި 0.2 ގްރާމްގެ ޑައިމޯފިން ޕެކެޓްތަކާއި، ދެ ޑިޖިޓަލް ކަށްޓާއި، ކަރުދާހުން ހަދާފައިވާ ތިން ސަމުސާ އަދި 261،000 ރުފިޔާ ހޯދާފައިވެއެވެ.
މަސްތުވާތަކެއްޗާބެހޭ ޤާނޫނުގެ ދަށުން، މަސްތުވާތަކެއްޗަށް ދެވިހިފާފައިނުވާ މީހެއްގެ އަތުން ހަތަރު ގްރާމަށްވުރެ ގިނައިން ޑައިމޯފިން ފެނިއްޖެނަމަ، އެއީ ޓްރެފިކްކުރުމަށް ގެންގުޅޭ އެއްޗެއްކަމަށް ބެލެވޭނެއެވެ. މިފަދަ ކުށެއްގެ އަދަބަކީ އުމުރަށް ޖަލަށްލުމާއެކު، 100،000 ރުފިޔާއާއި 10،000،000 ރުފިޔާއާ ދެމެދުގެ އަދަދަކުން ޖޫރިމަނާކުރުމެވެ. އަދި ކުށުގެ ޢަމަލުން ހޯދާފައިވާ މުދަލާއި ފައިސާ ވެސް ދައުލަތަށް ނެގޭނެއެވެ.
ކޯޓުން މި މައްސަލަ ޝައްކެއްނެތް މިންވަރަށް ސާބިތުވާކަމަށް ކަނޑައަޅައި، ހުކުމް އިއްވުމުގެ ކުރިން އަބްދުﷲ ބަންދުގައި ހޭދަކޮށްފައިވާ އެއް އަހަރާއި ނުވަ މަސްދުވަސް އުނިކުރުމަށްފަހު، 23 އަހަރާއި ދެ މަހާއި 25 ދުވަހުގެ ޖަލު އަދަބަކާއެކު، 400،000 ރުފިޔާއިން ޖޫރިމަނާކުރުމަށް ވަނީ ނިންމާފައެވެ.
