ލ. އަތޮޅު ގަމު ކޯޓުގެ މެޖިސްޓްރޭޓަކު އޭނާގެ ކުރީގެ އަނބިމީހާއަށް އަނިޔާކުރި މައްސަލައެއް ދިވެހި ފުލުހުންގެ ޚިދުމަތުން ތަޙްޤީޤު ކުރަން ފަށާއިފިއެވެ. ބައެއް މީޑިއާތަކުން ރިޕޯޓު ކޮށްފައިވާ ގޮތުގައި މި މައްސަލައިގައި އަނިޔާ ލިބިފައިވާ 39 އަހަރުގެ އަންހެން މީހާ، އެކަން ފުލުހުންނަށް ރިޕޯޓު ކުރީ މިއަދު ހަވީރުގެ ވަގުތެއްގައެވެ.
މައްސަލައާ ގުޅޭގޮތުން ފުލުހުން އިތުރު ތަފްސީލް ހާމަނުކުރެއްވި ނަމަވެސް، ފުލުހުންގެ މީޑިއާ އޮފިޝަލް ވަނީ މި މައްސަލަ ތަޙްޤީޤު ކުރަމުންދާކަން ބައެއް މީޑިއާތަކަށް ކަށަވަރުކޮށްދެއްވާފައެވެ. މުއުތަބަރު ގޮތެއްގައި ލިބިފައިވާ މަޢުލޫމާތުގައިވާ ގޮތުން، އަނިޔާގެ ޝިކާރައަކަށްވީ އަންހެން މީހާއަށް ވަރަށް ބޮޑެތި އަނިޔާތަކެއް ލިބިފައިވެއެވެ.
ގެވެށި އަނިޔާގެ މައްސަލަތައް ރާއްޖޭގައި އިތުރުވަމުން އަންނަކަމީ ކަމާބެހޭ އިދާރާތަކުން އަބަދުވެސް ކަންބޮޑުވުން ފާޅުކުރަމުންދާ ކަމެކެވެ.
