މިއަހަރު މިހާތަނަށް ރާއްޖެއަށް 1.6 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ. މިއީ 2023 ވަނަ އަހަރުގެ މިމުއްދަތާ އަޅާބަލާއިރު 9.6 އިންސައްތައިގެ އިތުރުވުމެކެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި ނޮވެމްބަރ 3 އާ ހަމައަށް ރާއްޖެއަށް 1,683,150 ފަތުރުވެރިން ޒިޔާރަތްކޮށްފައިވެއެވެ. މިދިޔަ އަހަރުގެ މި މުއްދަތުގައި 1,535,378 ފަތުރުވެރިން ޒިޔާރަތްކޮށްފައިވެއެވެ.
ފަތުރުވެރިންގެ އަދަދުން ޗައިނާ އެންމެ އިސް ސަފުގައި ދެމިހުރިއިރު، ރަޝިޔާ ދެވަނަ ހިސާބުގައި ރަނގަޅަށް ހިފަހައްޓާފައިވެއެވެ. މިހާތަނަށް އެންމެ ގިނަ ފަތުރުވެރިން އަންނަ މާކެޓުން 240,000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، ރަޝިޔާއިން 187,000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.
**2024 ގެ އެންމެ މަތީ 10 މާކެޓް**
1. ޗައިނާ: 240,401
2. ރަޝިޔާ: 187,270
3. ޔޫކޭ: 143,909
4. ޖަރުމަނުވިލާތް: 127,446
5. އިޓަލީ: 115,425
6. އިންޑިއާ: 101,963
7. ޔޫއެސްއޭ: 55,976
8. ފްރާންސް: 44,879
9. ސްޕެއިން: 39,568
10. ސުވިޒަލޭންޑް: 32,903
އަހަރީ ގޮތުން ދުވާލަކަށް އެވްރެޖްކޮށް 5,465 ފަތުރުވެރިން ޒިޔާރަތްކުރާއިރު، އަހަރީ ގޮތުން އެވްރެޖްކޮށް މަޑުކުރާ މުއްދަތަކީ 7.7 ދުވަހެވެ.
ރާއްޖެއަށް 1.6 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، ސަރުކާރުން ކުރިން އަމާޒުކޮށްފައިވަނީ އަހަރެއްގެ މައްޗަށް 2 މިލިއަން ފަތުރުވެރިން ގެނައުމަށެވެ.
