ފުލުހުންނަށް އިންޓެލިޖެންސް މައުލުމާތަކާއި ގުޅިގެން ބަލައި ފާސްކުރިއިރު ބޮކްސާއާ ތެރެއިން މަސްތުވާތަކެތި ފެނުނު މީހަކު ޖޫރިމާނާކޮށް، އުމުރަށް ޖަލަށް ލާން ހުކުމް ކޮށްފިއެވެ.
ކުރިމިނަލް ކޯޓުން ކުރި ހުކުމުގައި ވަނީ، ފުލުހުންނަށް އިންޓެލިޖެންސް މައުލޫމާތެއް ލިބުމާ ގުޅިގެން، އިބްރާހިމް އާޒިމް ނަމަކަށް ކިޔާމހަކު މަސްތުވާތަކެތީގެ ވިޔަފާރިކުރާ ކަމަށް ބެލެވޭތީ، 2022 މެއި 10 ވަނަ ދުވަހު ފުލުހުން އޭނާ ރަށްދެބައި މަގުން މަޖީދީމަގަށް ދަނިކޮށް ހުއްޓުވައި ބަލައިފާސްކުރި ކަމުގައެވެ.
ބަލައިފާސްކުރުމުގައި އޭނާގެ ބޮކްސާއާއި ހަށިގަނޑާ ދޭތެރޭގައި ފޮރުވާފައި ހުރި ފިލްމު ދަޅަކާއި ޕްލާސްޓިކް ފުޅިއަކުން ޖުމްލަ 64 ގްރާމްގެ ކެނަބިސް ފެނުނެވެ. އެއީ ޤާނޫނުގައި ބަޔާންކުރާ މިންވަރަށްވުރެ އެތައް ގުނައެއް ގިނަ އަދަދެކެވެ. 14 ގްރާމަށްވުރެ ގިނައިން ކެނަބިސް އަތުން ފެނިއްޖެނަމަ، އެއީ ޓްރެފިކްކުރުމަށް ގެންގުޅުނު މިންވަރެއްކަމަށް ޤާނޫނުގައި ބަޔާންކުރެއެވެ.
މައްސަލައިގެ ތަޙްޤީޤުގައި ސީނަށް ދިޔަ ފުލުހުންގެ ހެކިބަހާއި މަސްތުވާތަކެތީގެ ތަހުލީލު ރިޕޯޓު ހުށަހެޅުމާއެކު، އިބްރާހިމް އާޒިމްގެ މައްޗަށް ކެނަބިސް ޓްރެފިކްކުރުމުގެ ދައުވާ ކްރިމިނަލް ކޯޓުން ސާބިތުކޮށްފިއެވެ. މިއީ އޭނާގެ މައްޗަށް ފުރަތަމަ ފަހަރަށް ކުށެއް ސާބިތުވުމާއެކު، އެންމެ ކުޑަ އަދަދުކަމަށްވާ 100،000 ރުފިޔާއިން ޖޫރިމަނާކޮށް، އުމުރަށް ޖަލަށްލުމަށް ޙުކުމްކޮށްފައިވެއެވެ.
އުމުރަށް ޖަލަށްލުމުގެ ޙުކުމް ރާއްޖޭގައި ތަންފީޒުކުރެވެނީ 25 އަހަރަށެވެ. އިބްރާހިމް އާޒިމް މިހާތަނަށް މި މައްސަލައިގައި 100 ދުވަސް ބަންދުގައި ހޭދަކޮށްފައިވާތީ، އޭނާ ތަންފީޒުކުރަންޖެހޭނީ 24 އަހަރާއި 265 ދުވަހުގެ ޙުކުމެވެ.
