ދީނުގައި އަންގަވާފައި ގޮތާއި ޚިލާފަށް ހަށިގަނޑު ހާމަކޮށްގެން ކުރާ ކަމަކުން ލިބޭނެ ރީތިނަމެއް، ކާމިޔާބީއެއް ނޯންނާނެ ކަމުގައި ރައީސް މުއިއްޒު ވިދާޅުވެއްޖެއެވެ.

ރައީސް މުއިއްޒު މިހެން ވިދާޅުވެފައިވަނީ، ދިވެހި ޒުވާން އަންހެން ކުއްޖަކު ބައިނަލްއަގުވާމީ ރީތީގެ މުބާރާތުގައި ބައިވެރިވުމާއި ގުޅިގެން އެކަމަށް ގިނަބައެއްގެ ފާޑު ކިއުން އަމާޒުވެފައިވަނި ކޮށެވެ.

މި މައްސައަށް އަމާޒުކޮށް ރައީސް މުއިއްޒު ކުރެއްވި އެކްސް ޕޯސްޓުގައި ވިދާޅުވެފައިވަނީ މާތްﷲ ރުހިވޮޑިނުގަންނަވާ ގޮތަށް ހަށިގަނޑު ހާމަކޮށްގެން ކުރާ އެއްވެސް މަސައްކަތަކުން ނުވަތަ ކުޅިވަރަކުން، އެއީ ފިރިހެނަކު ނުވަތަ އަންހެނަކު ކަމުގައި ވިޔަސް، އެމީހަކަށް ނުވަތަ އެމީހެއްގެ ދީނާއި ޤައުމަށް ހަޤީޤީ ރީތި ނަމެއް، އުފަލެއް އަދި ކާމިޔާބީއެއް ވެސް ނުލިބޭނެ ކަމަށެވެ.

މިކަމާއި ގުޅޭގޮތުން ރައީސް މުއިއްޒު ވަނީ ކީރި ގުރުއާންގެ އާޔަތެއްވެސް އެމަނިކުފާނުގެ އެކްސް ޕޯޓުގައި ގެންނަވާފައެވެ.

އެ އާޔަތުގެ މާނައަކީ: "އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާޠިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާޠިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ."

މިއަހަރުގެ މިސް ޔުނިވާސް މުބާރާތުގައި ފުރަތަމަ ފަހަރަށް ދިވެއްސެއްގެ ގޮތުގައި 21 އަހަރުގެ މޮޑެލް، މަރިޔަމް ޝައިނާ ނަސީމް ބައިވެރިވުމާ ގުޅިގެން ސަރުކާރުގެ ފަރާތުން ޔޫތު މިނިސްޓްރީން ނެރުއްވި ބަޔާނެއްގައި ވަނީ މިފަދަ ހަރަކާތްތަކަކީ ދިވެހިންގެ ދީނާއި، އަޤީދާއާއި، ސަގާފަތާ ނުގުޅޭ ކަންކަން ކަމަށާއި، އަދި އާންމު އަޚްލާޤީ މިންގަނޑުތަކާ ޚިލާފު ކަމެއްކަމަށް ބަޔާން ކޮށްފައެވެ. އަދި މި ކަމުގައި ދިވެއްސަކު ބައިވެރިވުން ސަރުކާރުން ކުށްވެރިކުރާ ކަމަށާއި، އެކަން ހުއްޓާލުމަށްވެސް މި ބަޔާނުގައި ގޮވާލާފައި ވެއެވެ.

އަދި އެފަދަ ކަންކަމަކީ ދިވެހިން ގަބޫލުކުރާ އާއްމު އަހުލާގީ މިންގަނޑުތަކާއި އުސޫލުތަކާއި ވެސް ހިލާފު ކަންކަމަށްވާއިރު ރާއްޖެ ތަމްސީލު ކުރުމުގައި ދިވެއްސަކު އެފަދަ ހަރަކާތްތަކަށް ދިއުން ދިވެހި ސަރުކާރުން ކުށްވެރި ކުރަމެވެ.

ބަޔާނުގައިވެއެވެ.

އެހެންނަމަވެސް ސަރުކާރުގެ މި ބަޔާނާއި ގުޅިގެން ސޯޝަލް މީޑިއާގައި ފާޑުކިޔާ ބައެއް ފަރާތްތަކުން ވަނީ، އައުރަ ނިވާނުކޮށް ބޮޑީ ބިލްޑިންގ މުބާރާތްތަކުގައި ފިރިހެނުން ބައިވެރިވުމާއި، އެފަދަ މުބާރާތްތައް ރާއްޖޭގައި ބޭއްވުމާއި، ރާއްޖެ ތަމްސީލުކުރުން އެއީ ސަރުކާރަށް މައްސަލައަކަށް ނުވާ ކަމެއްތޯ ސުވާލު އުފައްދާފައެވެ.