"ބިންވެރިޔާ" ސްކީމްގެ ދަށުން ހުޅުމާލޭގެ ދެވަނަ ފިޔަވަހިން މާލެ މީހުންނަށް ދޭން ޖެހޭ ގޯތިތައް ދީ ނިންމައިފިއެވެ.
ހައުސިން މިނިސްޓްރީން ރޭ އެކްސްގައި ކުރި ޕޯސްޓެއްގައި ބުނީ ރައީސްގެ ވައުދާ އެއްގޮތަށް، ހުޅުމާލެ 2 އިން ދޫކުރި ހުރިހާ ގޯއްޗެއް އެ ތަންތަނުގެ ވެރިފަރާތާ ހަވާލުކޮށް މިހާރު ނިމިފައިވާ ކަމަށެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ކުރިއަށް ގެންދިޔަ "ބިންވެރިޔާ" ސްކީމްގެ ދަށުން ހުޅުމާލެ 2 އިން ވަނީ މާލޭ މީހުންނަށް 1،408 ގޯތި ދޫކޮށްފައެވެ.
ހުޅުމާލެ ދެވަނަ ފިޔަވަހީގެ އިތުރުން ހުޅުމާލެ ތިން ވަނަ ފިޔަވަހިން 699 ގޯތި ދޭން ވެސް ކުރީގެ ސަރުކާރުން ވަނީ ނިންމައިފައެވެ. އެ ގޯތިތައް ދިނުމަށް ބޭނުންވާ ބިން ހިއްކުމުގެ މަސައްކަތް އެޗްޑީސީން ދަނީ ކުރަމުންނެވެ.
ބިންވެރިޔާ ސްކީމްގެ ދަށުން ހުޅުމާލެ އާއި ގުޅިފަޅު އަދި ގިރާވަރުފަޅުން މާލޭ މީހުންނަށް 9،000 އަށް ވުރެ ގިނަ ގޯތި ދޭން ވަނީ ނިންމައިފައެވެ.
ކުރީގެ ސަރުކާރުން ގުޅިފަޅުން ދޭން ނިންމި ގޯތިތަކާއި މި ސަރުކާރު އައިފަހުން ގިރާވަރުފަޅުން ގުޅިފަޅަށް ބަދަލުކުރި ގޯތިތަކާ އަދި ގުޅިފަޅުގެ ލޭންޑް ޔޫސް ޕްލޭނަށް ބަދަލު ގެނެސްފައި ވާތީ، އެތަނުން ގޯތި ލިބުނު މީހުންގެ މެދުގައި އަލުން ގުރުއަތުލާން މިހާރު ވަނީ ފަށައިފައެވެ.
