އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ ހެވީލޯޑް ކުންފުނިން ނަގާފައިވާ 11 މިލިއަން ޑޮލަރުގެ ލޯނު ނުދައްކައިގެން، އެ ކުންފުނީގެ ތިން ރަށެއް ވިއްކާލުމަށް ބޭންކު އޮފް މޯލްޑިވްސްއިން އިއުލާން ކޮށްފިއެވެ.
ވިއްކާލުމަށް ހުށަހަޅާފައިވާ ރަށްތަކަކީ މިހާރު ރަހާ ރިސޯޓުގެ ގޮތުގައި ހިންގަމުންދާ ފަރެސް އައިލެންޑާއި ކުޑަފަރެސް އައިލެންޑް، އަދި ދަނޑުވެރިކަމަށް ދޫކޮށްފައިވާ ބޮޑުހުރާ އައިލެންޑެވެ. މި ރަށްތަކުގެ ހެޑްލީޒް 2064 ވަނަ އަހަރާ ހަމައަށް އޮންނާނެއެވެ.
ބޭންކުން ވަނީ މި ރަށްތައް ގަތުމަށް ޝައުޤުވެރިވާ ފަރާތްތަކަށް ދެ ގޮތަކަށް ބިޑު ހުށަހެޅުމުގެ ފުރުސަތު ދީފައެވެ. އެއް ގޮތަކީ ތިން ރަށް އެއްކޮށް ގަތުމަށް މަދުވެގެން 23,262,000 ޑޮލަރަށް ބިޑު ހުށަހެޅުމެވެ. އަނެއް ގޮތަކީ ފަރެސް އައިލެންޑާއި ކުޑަފަރެސް އައިލެންޑް އެއްކޮށް، އަދި ބޮޑުހުރާ އައިލެންޑް ވަކިން، ކޮންމެ ބަޔަކަށް މަދުވެގެން 23,262,000 ޑޮލަރަށް ބިޑު ހުށަހެޅުމެވެ.
ޝައުޤުވެރިވާ ފަރާތްތަކަށް އަންނަ މަހުގެ 28 ވަނަ ދުވަހުގެ މެންދުރުފަހު 12 ގެ ކުރިން ޕްރޮޕޯސަލް ހުށަހެޅުމުގެ ފުރުސަތު ބޭންކުން ވަނީ ހުޅުވާލަފައެވެ.
މި ރަށްތައް ވިއްކާލަން އިޢުލާނުކުރިއިރު، ހެވީލޯޑް އަކީ މީރާއަށް ޓެކްސް ނުދައްކާ ކުންފުނިތަކުގެ ލިސްޓުގައި ހިމެނޭ ކުންފުންޏެއްކަން ފާހަގަ ކޮށްލެވެއެވެ.
