ޑޮމެއިން ނަންބަރު ދޫކުރުމުގެ އުސޫލުތަކަށް އިސްލާހު ގެނައުމަށްފަހު އަންނަ މަހު އަލުން ނަންބަރު ދޫކުރަން ފެށުމަށް ނިންމާފައިވާކަން ޓްރާންސްޕޯޓް މިނިސްޓްރީން މިއަދު ހާމަކޮށްފިއެވެ. ބޮޑު އަގެއްގައި ނީލަމުގެ އުސޫލުން ވިއްކަމުން އައި ޑޮމެއިން ނަންބަރުތައް ވިއްކުން ކުރީގެ ސަރުކާރުން ވަނީ 2023 ވަނަ އަހަރުގެ އޮގަސްޓް މަހު ހުއްޓާލާފައެވެ.
މި ޚިދުމަތް އަލުން ފެށުމުގެ ކުރިން ރެކޯޑުތައް ބަލަހައްޓައި، މޮނިޓަރ ކުރާނެ ހަރުދަނާ ނިޒާމަކާއި ގަވާއިދެއް އެކުލަވާލުމަށް މިނިސްޓްރީން ވަނީ ނިންމާފައެވެ. ނޫސްބަޔާނުގައި ފާހަގަކޮށްފައިވާ ގޮތުގައި، މި ޚިދުމަތް އަލުން ފެށުމުގައި ދިމާވާ އެންމެ ބޮޑު ގޮންޖެހުމަކީ، ކުރިން ޑޮމެއިން ރެކޯޑުތައް ހަރުދަނާ ގޮތެއްގައި ބަލަހައްޓާފައި ނެތުމެވެ.
އަންނަ ނޮވެމްބަރު މަހުގެ ތެރޭގައި އަލުން މި ޚިދުމަތް ފަށައި، ދިމާވެފައިވާ މައްސަލަތަކަށް ހައްލު ހޯދުމުގެ މަސައްކަތް ފެށުމަށް މިނިސްޓްރީން ދަނީ މަސައްކަތްކުރަމުންނެވެ. އަދި ޚިދުމަތް ފޯރުކޮށްދިނުމަށް ދޫކުރެވޭ އެންމެހައި ލިޔެކިޔުންތައް ސެކިއުރިޓީ ފީޗަރތައް އެކުލެވޭ ލިޔުންތަކަކަށް ބަދަލުކުރުމަށްވެސް ވަނީ ނިންމާފައެވެ.
ޓްރާންސްޕޯޓް މިނިސްޓަރު މުހައްމަދު އަމީން ކުރިން ހާމަކުރެއްވި ގޮތުގައި، ޑޮމެއިން ނަންބަރު ވިއްކުން ހުއްޓާލުމާ ހަމައަށް 1،200 ނަންބަރު ދޫކޮށްފައިވާއިރު، އޭގެ ތެރެއިން 50 ޕަސެންޓް ނަންބަރުގައި މައްސަލަތައް ހުރި ކަމަށް ވިދާޅުވެފައިވެއެވެ.
