މާލެ އަތޮޅު ކުރޭންޑް ޕާކް ކޮއްދިއްޕަރު ސްޓާފް ފެރީއަށް ލޯންޗެއް ޖެހި ނުރައްކާތެރި އެކްސިޑެންޓެއް ހިނގައި 12 މީހަކަށް އަނިޔާ ވެއްޖެއެވެ. މި ހާދިސާ ހިނގި ގޮތުގެ މަޢުލޫމާތު "ޚަބަރު އޮންލައިން"އާއި ހިއްސާކުރިފަަރާތުން ބުނެފައިވަނީ ބާރު ސްޕީޑުގައި ދުއްވާފައި އައި ލޯންޗު އަރާފައިވަނީ ސްޓާފް ފެރީގެ އަރިމައްޗަށް ކަމުގައެވެ.
މި ހާދިސާގައި ފެރީ ލޯންޗުގައި ތިބި ހަތަރު މީހަކަށް އަނިޔާވެ، ރިސޯޓުގެ ލޯންޗެއްގައި މާލެ ގެންގޮސްފައިވެއެވެ. އެކްސިޑެންޓުގައި ޖެހުނު ދެ ލޯންޗު މިވަގުތު ވަނީ ތިން ނަންބަރު ފާލަމުގައެވެ. 60 މީހުންގެ ޖާގައިގެ ކުރޭންޑް ޕާކް ކޮއްދިއްޕަރު ސްޓާފް ފެރީގައި އެވަގުތު ދަތުރުކުރަމުން ދިޔައީ އެ ރިސޯޓުގެ 30 ވަރަކަށް މުވައްޒަފުންނެވެ.
އެކްސިޑެންޓްވި އަނެއް ލޯންޗަކީ ހަލަވެލި ރިސޯޓަށް މާލެއިން ފުރައިގެން ދަތުރުކުރަމުންދިޔަ ލޯންޗެކެވެ. އެ ލޯންޗަށްވެސް ބޮޑެތި ގެއްލުންތަކެއް ވެފައިވާއިރު، އެ ލޯންޗުގައި ތިބި މީހުންނަކީ ދިރާގު ރޯޑްރޭސް ޖާޒީ ލައިގެން ތިބި ރިސޯޓު މުވައްޒަފުން ކަމަށް ބެލެވެއެވެ.
ފުލުހުން މަޢުލޫމާތު ދީފައިވާ ގޮތުގައި، ގުޅީފަޅު ކައިރިން ދެ ލޯންޗް ޖެހި އެކްސިޑެންޓެއް ހިނގައިގެން އުޅޭ ކަމުގެ ރިޕޯޓް 19:34 އެހައިކަށްހާއިރު ވަނީ ލިބިފައެވެ. މި ހާދިސާގައި އަނިޔާވި ހަތަރު މީހުން މިވަގުތު ވަނީ އައިޖީއެމްއެޗަށް ގެންގޮސްފައެވެ. ފުލުހުން މިހާރުވެސް އެ ސަރަހައްދުގައި ހަރަކާތްތެރިވަމުން އެބަދެއެވެ.
